ჩემპიონთა ლიგის ფინალის დასრულების შემდეგ, საფრანგეთის ქალაქებში მასშტაბური არეულობები დაიწყო. საფრანგეთის შინაგან საქმეთა მინისტრის, ლორან ნიუნიესის განცხადებით, „პარი სენ-ჟერმენის“ გამარჯვების საზეიმო ღონისძიებები ვანდალიზმსა და სამართალდამცველებთან შეტაკებებში გადაიზარდა.

ოფიციალური მონაცემებით, მთელი ქვეყნის მასშტაბით 780 ადამიანი დააკავეს. მხოლოდ პარიზში დაკავებულთა რაოდენობა 480-ს შეადგენს. ამ დროისთვის საფრანგეთის დედაქალაქში 277 პირი რჩება პატიმრობაში, მათ შორის 82 არასრულწლოვანია. მინისტრის განმარტებით, მიუხედავად ინციდენტების სიმრავლისა, ვითარება ამჟამად კონტროლს ექვემდებარება.

3 ფოტო — დააჭირე გასადიდებლად

არეულობების შედეგად დაშავდა 219 ადამიანი. მათგან რვის მდგომარეობა მძიმეა, მათ შორის არის 17 წლის მოზარდი, რომელმაც ცივი იარაღით მძიმე ჭრილობები მიიღო. დაშავებულთა შორის 57 პოლიციელი და ჟანდარმერიის თანამშრომელია, რაც მიუთითებს სამართალდამცველებზე განხორციელებული თავდასხმების ინტენსივობაზე.

საგულისხმოა, რომ არეულობები 30 მაისის საღამოს, მატჩის დასრულებისთანავე დაიწყო. პარიზსა და სხვა დიდ ქალაქებში დაფიქსირდა ვანდალიზმისა და მაღაზიების ძარცვის ფაქტები. სამართალდამცველები საზოგადოებრივი წესრიგის აღდგენას მთელი ღამის განმავლობაში ცდილობდნენ.

2 ფოტო — დააჭირე გასადიდებლად