„რეფორმერფიტნესის“ მფლობელი გიორგი ფუტკარაძე საკონსტიტუციო სასამართლოში სარჩელს შეიტანს. საქმე ეხება ადმინისტრაციულ სამართალდარღვევათა და სისხლის სამართლის კოდექსებში განხორციელებულ ცვლილებებს, რომლებიც ბიზნესმენებს „საჯარო პოლიტიკურ აქტივობას“ უკრძალავს.

ფუტკარაძის განცხადებით, ბიზნესი ეკონომიკის ხერხემალია და ის არ უნდა შემოიფარგლებოდეს მხოლოდ მოგების მიღებით. მისი თქმით, კერძო სექტორი ვალდებულია, მონაწილეობა მიიღოს დემოკრატიულ პროცესებში, აფიქსირებდეს პოზიციას ქვეყანაში მიმდინარე მოვლენებზე და აკრიტიკებდეს ხელისუფლებას, თუ ეს საჭიროა.

„ბიზნესი უნდა ახდენდეს გავლენას საზოგადოებრივ ცხოვრებაზე და თავისუფლად განკარგავდეს საკუთარ რესურსებს ღირებულებების შესაბამისად“, - აცხადებს ფუტკარაძე. ის მიიჩნევს, რომ ეს შეზღუდვები საერთო ბიზნესგარემოს აუარესებს და სახელმწიფოს აზიანებს.

მეწარმემ ხაზგასმით აღნიშნა, რომ მიუხედავად სასამართლო პროცესის მიმდინარეობისა, ის არ აპირებს თვითცენზურას და საკუთარი პოზიციის დაფიქსირებას გააგრძელებს. მისი მიზანია, საკონსტიტუციო სასამართლომ სამართლებრივი პოზიცია დააფიქსიროს, რაც ისტორიისთვის მნიშვნელოვანი იქნება.

აღნიშნული შეზღუდვები 2026 წლის მარტში „გრანტების შესახებ კანონში“ შესული გამკაცრებული ცვლილებების ნაწილია. რეგულაციის თანახმად, ბიზნესმენებს აეკრძალათ ნებისმიერი პოლიტიკური აქტივობა, რომელიც მათი „ძირითადი საქმიანობის“ ფარგლებს სცდება.

კანონის დარღვევის შემთხვევაში, აუდიტის სამსახური პირველ ჯერზე 20 000 ლარით აჯარიმებს ბიზნესსუბიექტს, განმეორებითი დარღვევისას კი ჯარიმა 40 000 ლარამდე იზრდება.

თავის მხრივ, მმართველი პარტია „ქართული ოცნება“ ამ ცვლილებებს „ქვეყნის რევოლუციისგან დაცვის“ მექანიზმად მოიხსენიებს. მათი მტკიცებით, აღნიშნული კანონი მიმართულია არსებული რეგულაციების გვერდის ავლის გზების აღმოსაფხვრელად.