შინაგან საქმეთა სამინისტროს ინფორმაციით, რუსთავში სამართალდამცველებმა ავტოიმპორტიორი დააკავეს. მამაკაცი ბრალდებულია დიდი ოდენობით თანხის თაღლითურად დაუფლებაში.

გამოძიებამ დაადგინა, რომ დაკავებული პირი მოქალაქეებთან სხვადასხვა დროს ამყარებდა კომუნიკაციას. ის პოტენციურ კლიენტებს ჰპირდებოდა, რომ იაპონიიდან ავტომობილებს ჩამოუყვანდა.

საგამოძიებო უწყების ცნობით, თაღლითური სქემის შედეგად, ბრალდებულმა მოქალაქეებისგან ჯამში 4 900 აშშ დოლარი და 42 110 ლარი მიიღო. თუმცა, მან აღებული ვალდებულებები არ შეასრულა და თანხა სრულად, უკანონოდ მიითვისა.

დაკავება ოპერატიული და საგამოძიებო ღონისძიებების შედეგად განხორციელდა. ფაქტზე გამოძიება საქართველოს სისხლის სამართლის კოდექსის 180-ე მუხლით მიმდინარეობს, რაც თაღლითობას გულისხმობს.

3 ფოტო — დააჭირე გასადიდებლად

დანაშაული დიდი ოდენობით თაღლითობის შემთხვევაში 6-დან 9 წლამდე ვადით თავისუფლების აღკვეთას ითვალისწინებს. ამ ეტაპზე საქმეზე გამოძიება გრძელდება.