რუსთავში მომხდარი ტრაგიკული ინციდენტის საქმეზე სამართალდამცველებმა დამატებით ოთხი პირი დააკავეს. შინაგან საქმეთა სამინისტროს ინფორმაციით, გამოძიება ჯანმრთელობის განზრახ მძიმე დაზიანების ფაქტზე მიმდინარეობს, რამაც ადამიანის სიცოცხლის მოსპობა გამოიწვია.

გამოძიების მასალების მიხედვით, დაპირისპირება ფიზიკურ ძალადობაში გადაიზარდა. კონფლიქტის დროს მამაკაცი წაიქცა და თავის არეში მძიმე დაზიანება მიიღო, რის გამოც იგი ადგილზევე გარდაიცვალა. პოლიციამ ერთი პირი ცხელ კვალზე დააკავა, ხოლო შემდგომი საგამოძიებო მოქმედებების შედეგად, დამატებითი ბრალდებულები გამოავლინა.

3 ფოტო — დააჭირე გასადიდებლად

სამართალდამცველების თქმით, დაკავებულთა თანმხლები პირები ფიზიკურად გაუსწორდნენ გარდაცვლილის მეგობრებს. სწორედ ამ ეპიზოდის შესწავლის შემდეგ გახდა შესაძლებელი დამატებითი პირების პასუხისგებაში მიცემა.

ამ ეტაპზე გამოძიება სისხლის სამართლის კოდექსის 117-ე და 126-ე მუხლებით მიმდინარეობს. აღნიშნული მუხლები, დამტკიცების შემთხვევაში, 8 წლამდე ვადით თავისუფლების აღკვეთას ითვალისწინებს. საქმეზე საგამოძიებო მოქმედებები გრძელდება.