უკრაინის პრეზიდენტი ვოლოდიმირ ზელენსკი ლონდონში ოფიციალური ვიზიტის ფარგლებში დიდი ბრიტანეთისა და ჩრდილოეთ ირლანდიის გაერთიანებული სამეფოს მეფეს, ჩარლზ III-ს შეხვდა. შეხვედრა უკრაინისთვის კრიტიკულად მნიშვნელოვან დროს გაიმართა.

ზელენსკიმ შეხვედრის დეტალები სოციალურ ქსელში გააზიარა და აღნიშნა, რომ ეს იყო მორიგი ნაყოფიერი დიალოგი ბრიტანეთის მონარქთან. უკრაინის პრეზიდენტმა მადლობა გადაუხადა მეფეს და ბრიტანელ ხალხს უკრაინის მიმართ გამოჩენილი ურყევი მხარდაჭერისთვის.

3 ფოტო — დააჭირე გასადიდებლად

აღსანიშნავია, რომ ვოლოდიმირ ზელენსკი ლონდონში გუშინ ჩავიდა. ვიზიტის მიზანი უკრაინის უსაფრთხოების გარანტიების გაძლიერება და დასავლელ პარტნიორებთან კოორდინაციაა.

ბრიტანეთის დედაქალაქში პრეზიდენტმა უკვე გამართა მოლაპარაკებები დიდი ბრიტანეთის, საფრანგეთისა და გერმანიის ლიდერებთან. შეხვედრების მთავარი თემები ფრონტზე არსებული მძიმე ვითარება, თავდაცვისუნარიანობის გაზრდა და შემდგომი დიპლომატიური ნაბიჯები იყო.

ლონდონური ვიზიტი ხაზს უსვამს ბრიტანეთის როლს უკრაინის სამხედრო და პოლიტიკურ მხარდაჭერაში. გაერთიანებული სამეფო კვლავ რჩება კიევის ერთ-ერთ ყველაზე მტკიცე მოკავშირედ რუსეთის აგრესიის წინააღმდეგ ბრძოლაში.