უკრაინის პრეზიდენტი ვოლოდიმირ ზელენსკი დიდ ბრიტანეთში ჩავიდა. ლონდონში, დაუნინგ-სტრიტზე, ის ევროპელ მოკავშირეებთან ერთად გამართავს მოლაპარაკებებს, რომელსაც ბრიტანეთის პრემიერ-მინისტრი კირ სტარმერი მასპინძლობს.

შეხვედრას ესწრებიან საფრანგეთის პრეზიდენტი ემანუელ მაკრონი და გერმანიის კანცლერი ფრიდრიხ მერცი. ეს სამი ქვეყანა, რომლებიც „E3“-ის ჯგუფს ქმნიან, კიევის ერთ-ერთ უმთავრეს დასავლელ პარტნიორად რჩება. ბრიტანეთი და საფრანგეთი სათავეში უდგანან ინიციატივას, რომელიც უკრაინისთვის სამომავლო სამშვიდობო პროცესის ფარგლებში უსაფრთხოების გარანტიების უზრუნველყოფას გულისხმობს.

ზელენსკიმ სოციალურ ქსელში დაწერა, რომ მოლაპარაკებების მთავარი თემა უკრაინის თავდაცვა, საჰაერო თავდაცვის სფეროში თანამშრომლობის გაძლიერება და დიპლომატიური პერსპექტივებია. „ევროპა უნდა იყოს მოლაპარაკებების ნაწილი და უნდა იყოს ძლიერი“, — განაცხადა მან.

ვიზიტი იმ ფონზე მიმდინარეობს, როდესაც აშშ-ის პრეზიდენტი დონალდ ტრამპი ყურადღებას ძირითადად ირანთან მიმდინარე კონფლიქტზე ამახვილებს. გასული წლის დეკემბერში ვაშინგტონი აქტიურად ცდილობდა კიევსა და მოსკოვს ომის დასრულების გეგმაზე სწრაფად შეთანხმებულიყვნენ.

პარალელურად, უკრაინის ხელისუფლება რუსეთის „საზიზღარ“ თავდასხმებზე საუბრობს. კიევის ცნობით, რუსულმა დრონმა ჩერნობილის ატომურ ელექტროსადგურთან ახლოს მდებარე ბირთვული საწვავის საცავი დააზიანა. კომპანია „ენერგოატომის“ ინფორმაციით, ინციდენტის შედეგად რადიაციული ფონი ნორმაშია, მსხვერპლი არ არის, ხოლო ხანძარი ლიკვიდირებულია.

ამავდროულად, უკრაინის სამხრეთით, ზაპოროჟიეს რეგიონში, რუსული დარტყმების შედეგად სულ მცირე სამი ადამიანი დაიღუპა. ზაპოროჟიე ბოლო პერიოდში ინტენსიური თავდასხმების სამიზნეა.

უკრაინამ, თავის მხრივ, პეტერბურგის მიმართულებით განახორციელა დრონებით იერიში, რასაც რუსული მხარე „უპრეცედენტოს“ უწოდებს. რუსეთის პრეზიდენტმა ვლადიმერ პუტინმა უარი თქვა ზელენსკის წინადადებაზე პირისპირ შეხვედრის შესახებ და განაცხადა, რომ ომს მხოლოდ მაშინ დაასრულებს, როცა რუსეთის მიზნები მიღწეული იქნება.