„ოპოზიციური ალიანსის“ ლიდერი ზურა-გირჩი ჯაფარიძე ბიძინა ივანიშვილის მმართველობის სტილს „გამწვავებულ პარანოიას“ უწოდებს. მისი განცხადებით, მმართველი რეჟიმი იმ ფაზაშია, სადაც ლიდერს „ყველგან მტრები და შეთქმულებები ელანდება“.

„ქარდი“ როგორც ერთგულების ტესტი

ჯაფარიძის შეფასებით, საქართველოს დამოუკიდებლობის დღეს ტელეკომპანია „იმედის“ მიერ გამოქვეყნებული „ქარდი“, სადაც ბიძინა ივანიშვილი ზვიად გამსახურდიასა და მერაბ კოსტავასთან ერთად იყო გამოსახული, შემთხვევითი არ ყოფილა. მისი თქმით, ეს კონკრეტული გზავნილი საზოგადოებისთვის არ იყო გამიზნული.

„იმ კაცს სჭირდება ერთგულების პერმანენტული დადასტურება დაქირავებული მსახურებისგან. დროთა განმავლობაში ვიღაც შეიძლება გატყდეს, დაიღალოს ან გადაიბირონ. ამიტომ, ის მუდმივად ტესტავს მათ ერთგულებას“, — წერს ჯაფარიძე.

მსხვერპლშეწირვა და გროტესკული რეალობა

ჯაფარიძის მოსაზრებით, ივანიშვილი აკვირდება, ვინ „გააპრავა“ „იმედის“ მიერ გავრცელებული ქარდი და ვინ გაატარა საკითხი ჩუმად. ოპოზიციონერი ამ პროცესს გროტესკულს უწოდებს და აღნიშნავს, რომ მსახურებს, რომლებმაც უკვე ყველაფერზე მოაწერეს ხელი, ახალი დავალებების შესრულება უწევთ.

„რა უნდა მოსთხოვო დამატებით მონას, რომელმაც უკვე ყველაფერზე მოაწერა ხელი? წამება, გოგოების ცემა, ოკუპანტისთვის ბოდიში, ანწუხელიძის შეურაცხყოფა — ყველაფერი გაგიპრავა“, — აცხადებს ჯაფარიძე.

პარანოიის შედეგები

პოლიტიკოსი ირწმუნება, რომ სწორედ ამგვარი დამოკიდებულება და პარანოია განაპირობებს საკადრო ცვლილებებსა და შიდა დაპირისპირებებს რეჟიმის შიგნით. მისი თქმით, ივანიშვილი იწერს, თუ ვინ არის მისი ერთგული, რათა შეინარჩუნოს სრული კონტროლი თავის გარემოცვაზე.

ჯაფარიძის შეფასებით, ეს პროცესი მომავალში კიდევ უფრო რადიკალურ და უცნაურ ფორმებს მიიღებს, რადგან სისტემა მუდმივად მოითხოვს ერთგულების ახალ-ახალ დემონსტრირებას.