თბილისის საქალაქო სასამართლოს მოსამართლე ნინო გალუსტაშვილმა 61 წლის ზურაბ მენტეშაშვილი დამნაშავედ ცნო. მას ბრალი „გზის განმეორებით გადაკეტვაში“ დასდეს, რაც 2025 წლის ოქტომბერში მიღებული საკანონმდებლო ცვლილებების შედეგად დასჯადი ქმედება გახდა.

მენტეშაშვილს 9-თვიანი პატიმრობა მიესაჯა. რადგან მან წინასწარი პატიმრობის სახით უკვე 7 თვე გაატარა საპატიმროში, მას ციხეში დარჩენილი ორი თვის გატარება მოუწევს. მოსალოდნელია, რომ ის თავისუფლებას აგვისტოში დაუბრუნდება.

საქმის დეტალები

ზურაბ მენტეშაშვილი პირველად 2025 წლის 24 ოქტომბერს დააკავეს. მაშინ ის პარლამენტის წინ, რუსთაველის გამზირზე მიმდინარე აქციების დროს „გზის გადაკეტვისთვის“ ადმინისტრაციული წესით დაისაჯა და 7 დღით დააპატიმრეს.

გათავისუფლებიდან მალევე, 31 ოქტომბერს, ის მსგავსი ქმედებისთვის კვლავ დააკავეს. სწორედ ამ ფაქტმა გამოიწვია ადმინისტრაციული სამართალდარღვევის სისხლის სამართლის საქმედ კვალიფიკაცია. ბრალდება საქართველოს სისხლის სამართლის კოდექსის 347-ე მუხლით იქნა წაყენებული.

„მე მიყვარს ჩემი სამშობლო, ყველაფერს გავაკეთებ მისთვის... არ ვიცოდი, თუ გზის გადაკეტვა დანაშაული იყო. აქ ვდგავარ და სხვაგვარად არ შემიძლია, დამაპატიმრეთ მეოთხედაც თუ გინდათ“, - განაცხადა მენტეშაშვილმა სასამართლოში დასკვნითი სიტყვისას.

საკანონმდებლო ფონი

2025 წლის 16 ოქტომბერს მიღებული საკანონმდებლო ცვლილებები აწესებს სისხლისსამართლებრივ პასუხისმგებლობას შეკრებებისა და მანიფესტაციების წესების დარღვევისთვის. მათ შორის არის გზის გადაკეტვა ან აქციებზე სახის დაფარვა. განმეორებითი ქმედება ითვალისწინებს ერთ წლამდე, ხოლო შემდგომი განმეორება — ორ წლამდე პატიმრობას.

პროტესტის ფონზე, რომელიც 2024 წლის 28 ნოემბერს, ევროინტეგრაციის პროცესის შეჩერების გამოცხადების შემდეგ დაიწყო, პოლიციამ ასობით მოქალაქე დააჯარიმა და დააკავა. 2025 წლის დეკემბერში შეზღუდვები ტროტუარებსაც შეეხო, სადაც „ადამიანთა თავისუფალი გადაადგილების ხელის შეშლა“ ადმინისტრაციულ სამართალდარღვევად გამოცხადდა.

ამავე მუხლით სისხლისსამართლებრივი დევნა მიმდინარეობს ზუგდიდელი აქტივისტის, შალვა ესართიას მიმართაც. ის ამჟამად წინასწარ პატიმრობაში იმყოფება და მას პოლიციის კანონიერი მოთხოვნის „განმეორებით დაუმორჩილებლობას“ ედავებიან.