საშვილოსნოს ყელის კიბოს საწინააღმდეგო ვაქცინამ ინგლისში უკვე 200-მდე ადამიანის სიცოცხლე გადაარჩინა. სამეცნიერო ჟურნალ The Lancet-ში გამოქვეყნებული ანალიზის მიხედვით, 2020-დან 2024 წლამდე პერიოდში 20-დან 24 წლამდე ქალებში საშვილოსნოს ყელის კიბოთი გარდაცვალების არცერთი შემთხვევა არ დაფიქსირებულა.

ეს პირველი შემთხვევაა, როდესაც ხუთწლიანი დაკვირვების განმავლობაში ამ ასაკობრივ ჯგუფში მსგავსი სტატისტიკა დაფიქსირდა. მკვლევართა შეფასებით, ვაქცინაციის გარეშე ამ პერიოდში დაახლოებით 23 ლეტალური შედეგი იყო მოსალოდნელი.

„წარმოუდგენელია, რომ ერთადერთმა აცრამ შეიძლება თითქმის სრულად აღმოფხვრას კიბოს კონკრეტული ტიპი“, — აცხადებს ლონდონის ქუინ მერის უნივერსიტეტის პროფესორი პიტერ სასიენი. კვლევამ ასევე აჩვენა, რომ მათ, ვინც ვაქცინა 12 ან 13 წლის ასაკში მიიღო, 30 წლამდე ამ დაავადებით გარდაცვალების რისკი პრაქტიკულად ნულის ტოლია.

ადამიანის პაპილომავირუსი (HPV), რომელიც კანთან ახლო კონტაქტით ვრცელდება, საშვილოსნოს ყელის კიბოს შემთხვევების 99%-ს იწვევს. მიუხედავად ვაქცინის მაღალი ეფექტურობისა, ინგლისში ვაქცინაციის მაჩვენებელი ჯერ კიდევ ჩამორჩება ჯანდაცვის მსოფლიო ორგანიზაციის მიერ რეკომენდებულ 90%-იან ნიშნულს.

კვლევის ავტორები პროგნოზირებენ, რომ გარდაცვალების მაჩვენებელი კიდევ უფრო შემცირდება, რადგან ვაქცინირებული თაობები იზრდებიან. თუმცა, ექსპერტები ხაზს უსვამენ, რომ მნიშვნელოვანია ვაქცინაციის მაღალი დონის შენარჩუნება და სკრინინგ პროგრამებში მონაწილეობა.

ალექსანდრა ლეგი, რომელსაც 30 წლის ასაკში საშვილოსნოს ყელის კიბო დაუდგინეს, ვაქცინაციის აუცილებლობაზე საუბრობს. მისი თქმით, ვაქცინაციის პროგრამის დროულად გავლა მას მძიმე მკურნალობისა და სტრესისგან დაიცავდა. დღეს იგი აქტიურად უჭერს მხარს აცრებს და აცხადებს, რომ მისი შვილი, აივი, პირველი იქნება რიგში, როდესაც ვაქცინაციის ასაკს მიაღწევს.

ბრიტანეთის მთავრობა გეგმავს, რომ 2040 წლისთვის საშვილოსნოს ყელის კიბო, როგორც საზოგადოებრივი ჯანდაცვის პრობლემა, სრულად აღმოფხვრას. ამ მიზნით ქვეყანაში მიმდინარეობს ვაქცინაციის კამპანიები და თვითტესტირების ნაკრებების დარიგება იმ ქალებისთვის, რომლებსაც სკრინინგი არ ჩაუტარებიათ.

Other