ზაფხულის დადგომასთან ერთად, მაღალი ტემპერატურის გამო, საქართველოს ტყეებში ხანძარსაშიში პერიოდი იწყება. გარემოს დაცვისა და სოფლის მეურნეობის სამინისტროს ეროვნული სატყეო სააგენტო პრევენციული ღონისძიებების ფარგლებში მთელი ქვეყნის მასშტაბით 350 ლოკაციაზე სპეციალურ საინფორმაციო ბანერებს განათავსებს.

„დაიცავი ტყეში ქცევის წესები“ – ასეთია ბანერების მთავარი გზავნილი. თითოეულ მათგანზე დატანილია QR კოდი, რომლის სკანირებითაც ტურისტებს საშუალება აქვთ, დეტალურად გაეცნონ უსაფრთხოების ნორმებს, მათ შორის, საპიკნიკე ადგილების მოწყობისა და კოცონის დანთების წესებს.

ეროვნული სატყეო სააგენტოს უფროსის, ბესიკ ამირანაშვილის განცხადებით, საინფორმაციო ნიშნები სწორედ ტურისტულად ყველაზე დატვირთულ უბნებში განთავსდება. მისივე თქმით, სტატისტიკურად, ტყის ხანძრების გამომწვევი მთავარი ფაქტორი ადამიანთა დაუდევრობაა, ამიტომ საზოგადოების ცნობიერების ამაღლება კრიტიკულად მნიშვნელოვანია.

რა წესები უნდა დაიცვათ ტყეში?

3 ფოტო — დააჭირე გასადიდებლად

სახელმწიფო ტყის ტერიტორიაზე ცეცხლის დანთება მკაცრად აკრძალულია ისეთ ადგილებში, როგორიცაა ხეების ვარჯის ქვეშ, წიწვიან მოზარდ ტყეში, ძველ ნახანძრალებსა და ტორფიან ადგილებში. ასევე, აკრძალვა ვრცელდება დაზიანებულ უბნებსა და ტყეკაფებზე.

ტყის დანარჩენ ტერიტორიაზე კოცონის დანთება დასაშვებია მხოლოდ სპეციალური ბაქნის წინასწარი მოწყობის შემთხვევაში. ეს გულისხმობს ცეცხლის კერიდან 1,5 მეტრის რადიუსში ნებისმიერი ადვილად აალებადი მასალის — ხმელი ბალახის, ფოთლების ან ფიჩხის — სრულად გაწმენდას.

სამართლებრივი პასუხისმგებლობა

საქართველოს ადმინისტრაციულ სამართალდარღვევათა კოდექსის მიხედვით, ტყეში სახანძრო უსაფრთხოების მოთხოვნათა დარღვევა, რაც ხანძრის გაჩენას ან გავრცელებას გამოიწვევს, 300-დან 500 ლარამდე ჯარიმას ითვალისწინებს. მნიშვნელოვანია აღინიშნოს, რომ დაუდევრობით გამოწვეული ხანძრის შედეგად ტყის მოსპობის შემთხვევაში, კანონი ითვალისწინებს თავისუფლების აღკვეთას ოთხიდან რვა წლამდე.