„ლივერპულის“ მეკარემ, ალისონ ბეკერმა გულახდილად ისაუბრა საკუთარ სტრატეგიაზე, რომელმაც კლუბის ქომაგებში დიდი უკმაყოფილება გამოიწვია. ბრაზილიელი ფეხბურთელის თქმით, გასული სეზონის მიწურულს „ენფილდზე“ მისი არყოფნა მხოლოდ ტრავმებით არ იყო განპირობებული.
ალისონმა პორტუგალიურენოვან გამოცემა Estadao-სთან საუბრისას დაადასტურა, რომ რიგი შეხვედრების გამოტოვება მისი მხრიდან წინასწარ გააზრებული ნაბიჯი გახლდათ. მიზანი მარტივი იყო — ზაფხულის მსოფლიო ჩემპიონატისთვის ოპტიმალური კონდიციების შენარჩუნება.
სტრატეგიული პაუზა თუ კლუბისადმი გულგრილობა?
გასულ სეზონში ალისონს გარკვეული ფიზიკური პრობლემები ნამდვილად ჰქონდა, განსაკუთრებით ბარძაყის ტრავმის გამო, რის გამოც კარის დაცვა გიორგი მამარდაშვილს და ფრედი ვუდმანს უწევდათ. თუმცა, მეკარის აღიარებამ ეს ისტორია ახალი კუთხით წარმოაჩინა.
„100%-ით მზად ვარ. „ლივერპულში“ თამაშების გამოტოვება იმ გეგმის ნაწილი იყო, რომელიც მუნდიალისთვის ჩემს მზადყოფნას უზრუნველყოფდა,“ — განაცხადა ბრაზილიელმა. მან ხაზგასმით აღნიშნა, რომ საკუთარი თავის ყველაზე მკაცრი კრიტიკოსია და გადაწყვეტილებებს მხოლოდ ფსიქოლოგიური და ტექნიკური ანალიზის საფუძველზე იღებს.
კრიტიკა „სკაუზერებისგან“
სეზონის ბოლო ორ თვეში ალისონმა „ლივერპულის“ მაისურით მხოლოდ ერთი მატჩი ჩაატარა — პრემიერლიგის დასკვნითი შეხვედრა „ბრენტფორდის“ წინააღმდეგ. ამ ფაქტმა გულშემატკივრებში გაღიზიანება გამოიწვია. „სკაუზერები“ ბრაზილიელს კლუბისადმი გულგრილ დამოკიდებულებაში სდებენ ბრალს.
გულშემატკივართა აზრით, იმ ფონზე, როდესაც „ლივერპულისთვის“ სეზონი განსაკუთრებით რთული და დაძაბული იყო, გუნდს თითოეული წამყვანი მოთამაშის სრული ჩართულობა ესაჭიროებოდა. ალისონის პრიორიტეტებმა კი კლუბის ინტერესები მეორე პლანზე გადაწია.
თავად მეკარე ამტკიცებს, რომ მასზე უკეთ არავინ იცის მისი ფიზიკური მდგომარეობა და ეს გადაწყვეტილება გრძელვადიან პერსპექტივაში მისი კარიერისთვის აუცილებელი იყო.
დისკუსია
0 კომენტარი
ჯერ კომენტარი არ არის — იყავი პირველი.