კლივლენდ კავალიერსისთვის აღმოსავლეთ კონფერენციის ფინალი კოშმარულად მიმდინარეობს. გუნდი სერიაში 0-3 მარცხდება და NBA-ის ისტორიაში არცერთ კლუბს არასდროს მოუგია სერია ასეთი ჩამორჩენის შემდეგ. მიუხედავად ამისა, კლივლენდის მთავარი მწვრთნელი კენი ეტკინსონი ოპტიმიზმს არ კარგავს და თავის არგუმენტებს მოწინავე ანალიტიკურ მონაცემებს ეყრდნობს.

კვირას გამართულ პრესკონფერენციაზე ეტკინსონმა განაცხადა, რომ სერიის პირველი სამი მატჩის სტატისტიკური მაჩვენებლები კლივლენდის უპირატესობაზე მეტყველებს. მისი თქმით, „მოსალოდნელი ქულის“ (expected score) მეტრიკის მიხედვით, კავალიერსმა სამიდან ორი მატჩი უნდა მოეგო.

რატომ განსხვავდება ციფრები რეალობისგან?

ეტკინსონის განმარტებით, მთავარი პრობლემა სროლების ეფექტურობაშია. ნიუ-იორკ ნიქსი სერიის განმავლობაში თავის მოსალოდნელ მაჩვენებელზე გაცილებით უკეთ ისვრის, ხოლო კლივლენდი, პირიქით — საკუთარი შესაძლებლობების ქვემოთ მოქმედებს.

„მე მესმის, რომ ეს არავის აინტერესებს. ყველას მხოლოდ საბოლოო შედეგი ხიბლავს და მეც მესმის, რატომაც. თუმცა, თუ პროცესს და ანალიტიკას დავუჯერებთ, ჩვენი გუნდი სწორად თამაშობს“, — აღნიშნა ეტკინსონმა.

ESPN-ის კვლევის თანახმად, კლივლენდმა მესამე მატჩში 17 ღია სამქულიანიდან 10 ააცილა. მთლიან სერიაში კი გუნდმა ღია პოზიციებიდან ნასროლი 65 სამქულიანიდან მხოლოდ 21 ჩააგდო, რაც 32%-იან სიზუსტეს შეადგენს.

ნიუ-იორკის სტაბილურობა

საპირისპირო ვითარებაა ნიქსის მხარეს. ნიუ-იორკელები ღია სამქულიანებს 42%-იანი სიზუსტით ათავსებენ კალათში. შაბათს, მესამე მატჩში, ნიქსმა 121:108 გაიმარჯვა, სადაც თამაშიდან სროლის საერთო პროცენტმა 56% შეადგინა.

მიუხედავად 0-3 ჩამორჩენისა, ეტკინსონი იხსენებს სერიის პოზიტიურ მომენტებს. „პირველ მატჩში 20 ქულით ვიგებდით, მეორე მატჩში კი, მესამე პერიოდის დასაწყისის ჩავარდნის გარდა, თამაში ძალიან დაძაბული იყო“, — განაცხადა მან.

ნიუ-იორკ ნიქსმა ზედიზედ 10 გამარჯვება მოიპოვა და ორშაბათს, მეოთხე მატჩში, მათ შეუძლიათ 1999 წლის შემდეგ პირველად გავიდნენ NBA-ის ფინალში. კლივლენდისთვის კი ეს მატჩი სეზონის გადარჩენის ბოლო შანსია.