Apple-მა თავისი საათების ოპერაციული სისტემის უახლესი ვერსია, watchOS 27, წარადგინა. განახლება მომხმარებლებს Siri AI-ის მხარდაჭერას, დინამიკურ აპლიკაციების ბადეს და ჯანმრთელობის მონიტორინგის გაუმჯობესებულ ინსტრუმენტებს სთავაზობს.

განახლება ხელმისაწვდომი შემოდგომიდან იქნება, თუმცა მისი მხარდაჭერა შეზღუდულია. ახალი ოპერაციული სისტემა მხოლოდ Apple Watch Series 10-ზე და უფრო ახალ მოდელებზე, მათ შორის Ultra 2, Ultra 3 და SE 3 ვერსიებზე იმუშავებს.

ყველაზე მნიშვნელოვანი სიახლე Siri AI-ია, რომელიც Apple Intelligence-ის ბაზაზე მუშაობს. სისტემას ემატება სპეციალური Siri-ს აპლიკაცია, რომელიც მომხმარებლის ყველა საუბარს ერთ სივრცეში აერთიანებს. ახლა შესაძლებელია საუბრის დაწყება საათზე და მისი გაგრძელება iPhone-ზე, ან პირიქით.

Siri-ს ახალი შესაძლებლობები მომხმარებელს საშუალებას მისცემს, ხმოვანი ბრძანებებით მართოს აპლიკაციები — გაუშვას მუსიკა, გააგზავნოს ელექტრონული ფოსტა ან დააყენოს აქტივობის მიზნები. აღსანიშნავია, რომ ფუნქცია ხელმისაწვდომი გახდება წლის ბოლოს დაგეგმილი ბეტა ვერსიის გაშვების შემდეგ.

ინტერფეისის კუთხით, Apple-მა დაამატა დინამიკური აპლიკაციების ბადე. ის ავტომატურად გამოყოფს Siri-ს მიერ რეკომენდებულ აპებს და ცენტრში ათავსებს ყველაზე ხშირად გამოყენებულ პროგრამებს, რაც ნავიგაციას ამარტივებს.

ჯანმრთელობა და ფიტნესი

Workout Buddy, რომელიც watchOS 26-ში დაინერგა, ახალ შესაძლებლობებს იღებს. ხელოვნურ ინტელექტზე დაფუძნებული მწვრთნელი ახლა უფრო ზუსტად ზომავს დისტანციას, ტემპს და ვარჯიშის ხანგრძლივობას როგორც ღია სივრცეში, ისე სარბენ ბილიკზე.

გაფართოვდა მენსტრუალური ციკლის მონიტორინგის ფუნქციაც — სისტემა მომხმარებელს აცნობებს პერიმენოპაუზის შესაძლო ნიშნების შესახებ. გარდა ამისა, Workout Buddy უკვე ესპანურ ენაზეც იქნება ხელმისაწვდომი.

სისტემური გაუმჯობესებები

watchOS 27 მოიცავს ზოგად ოპტიმიზაციებსაც: Smart Stack-ში ვიჯეტების მეტი რეკომენდაცია, მუსიკის უფრო სწრაფი დაკვრა და ბატარეის მუშაობის გაუმჯობესება. ასევე, დაემატა ახალი ჟესტი — საჩვენებელი და ცერა თითების შეერთებით მომხმარებელს შეუძლია ვიჯეტის არჩევა.

აპლიკაცია „Find My“ უფრო გამარტივებული გახდა, ხოლო „Liquid Glass“ დიზაინის ელემენტები ტექსტის კითხვას კიდევ უფრო კომფორტულს ხდის.