Meta-მ აღიარა მასშტაბური კიბერინციდენტი, რომლის დროსაც ჰაკერებმა კომპანიის ხელოვნური ინტელექტის მქონე ჩატბოტის გამოყენებით ათასობით Instagram ანგარიში გაიტაცეს. როგორც კომპანიის მიერ მენის შტატის გენერალური პროკურატურისთვის წარდგენილ ანგარიშშია აღნიშნული, დაზარალებულთა რაოდენობა სულ მცირე 20 225-ს შეადგენს.

კიბერშეტევა რამდენიმე თვის განმავლობაში გრძელდებოდა. ჰაკერები იყენებდნენ ჩატბოტის სისტემურ ხარვეზს, რომელიც პაროლების აღდგენის პროცესს მართავდა. სისტემა ვერ ახერხებდა სათანადოდ გადაემოწმებინა, ემთხვეოდა თუ არა მომხმარებლის მიერ მითითებული ელექტრონული ფოსტა ანგარიშთან დაკავშირებულ მისამართს.

შედეგად, თავდამსხმელებს შეეძლოთ ნებისმიერი ანგარიშის პაროლის შეცვლა, თუ მას არ ჰქონდა ჩართული ორფაქტორიანი ავთენტიფიკაცია (2FA). ჩატბოტი ავტომატურად უგზავნიდა პაროლის აღდგენის ბმულს ჰაკერის მიერ მითითებულ მეილზე, ნაცვლად რეალური მფლობელის მისამართისა.

რა ინფორმაციაზე მიუწვდებოდათ ხელი ჰაკერებს?

ანგარიშის გატაცების შემდეგ, თავდამსხმელებს სრული წვდომა ეხსნებოდათ მსხვერპლის პროფილზე. ეს მოიცავდა:

  • პირად მიმოწერასა და შეტყობინებებს;
  • დაბადების თარიღსა და საკონტაქტო ინფორმაციას;
  • ანგარიშის აქტივობის ისტორიას;
  • დაკავშირებულ სხვა ანგარიშებზე წვდომას.

Meta-ს განცხადებით, მათ ამ დროისთვის არ აქვთ ინფორმაცია იმის შესახებ, თუ კონკრეტულად რა ტიპის პერსონალური მონაცემები იქნა წვდომადი ან გამოყენებული თავდამსხმელების მიერ. კომპანიამ უკვე გამორთო საეჭვო ფუნქცია და მოახდინა იმ კოდის დეაქტივაცია, რომელიც ხარვეზს იწვევდა.

კიბერშეტევები აპრილის შუა რიცხვებში დაიწყო და მიმდინარე კვირამდე გაგრძელდა, სანამ Meta-მ სისტემა არ დაცვა. მიუხედავად იმისა, რომ კომპანიამ დაზარალებულებს პაროლების შეცვლისკენ მოუწოდა, ზოგიერთი მომხმარებელი კვლავ აცხადებდა შეტევების გაგრძელების შესახებ.

Meta-ს პრესსამსახურს მომხდარის დეტალებზე დამატებითი კომენტარი ამ დრომდე არ გაუკეთებია. კომპანია ამჟამად ამოწმებს სხვა პლატფორმებზე არსებულ მსგავს ჩატბოტებს, რათა მსგავსი ინციდენტების განმეორება თავიდან აიცილოს.