მსოფლიოს უმაღლეს მწვერვალზე, ევერესტზე, ნამდვილი სასწაული მოხდა. 6-დღიანი ინტენსიური ძებნის შემდეგ, მაშველებმა მთამსვლელი გიდი, დავა შერპა იპოვეს, რომელიც უგზო-უკვლოდ დაკარგულად ითვლებოდა.

დავა შერპა, რომელიც ალპინისტურ წრეებში „ჰილარი დავა შერპას“ სახელითაც არის ცნობილი, უკანასკნელად 7 500 მეტრის სიმაღლეზე, მე-3 ბანაკის ზემოთ შენიშნეს. ის მწვერვალის დაპყრობის შემდეგ უკან ბრუნდებოდა.

გიდის გაუჩინარებამ მთამსვლელთა შორის დიდი მღელვარება გამოიწვია. ევერესტის ამ მონაკვეთზე, რომელიც „სიკვდილის ზონის“ მიჯნაზეა, ექვსი დღის გატარება გადარჩენის უკიდურესად მცირე შანსს ტოვებს. ექსპერტები მის გადარჩენას უკვე „სასწაულს“ უწოდებენ.

BBC-ის ინფორმაციით, სამაშველო ოპერაცია უკიდურესად რთულ მეტეოროლოგიურ პირობებში მიმდინარეობდა. მაშველები ყოველდღიურად ცდილობდნენ მწვერვალის იმ მონაკვეთების შემოწმებას, სადაც დავა შერპა ბოლოს ნახეს.

ამჟამად გიდი უსაფრთხო ადგილზეა და მას შესაბამისი სამედიცინო დახმარება უტარდება. მისი ჯანმრთელობის მდგომარეობის შესახებ დეტალური ცნობები ჯერჯერობით არ ვრცელდება, თუმცა ფაქტი, რომ მან ასეთ მკაცრ კლიმატურ პირობებში ექვსი დღე გაატარა, უპრეცედენტო შემთხვევად ფასდება.

მთამსვლელთა საზოგადოება დავა შერპას გადარჩენას დიდი ოპტიმიზმით შეხვდა. ეს შემთხვევა კიდევ ერთხელ შეახსენებს მსოფლიოს, თუ რამდენად არაპროგნოზირებადი და სახიფათოა ევერესტის დაპყრობა, თუნდაც გამოცდილი პროფესიონალებისთვის.