ისრაელის სამხედრო კონტროლი ღაზას სექტორში, სამხრეთ ლიბანსა და სირიაში ოფიციალურ დოკუმენტებსა და რუკებზე მითითებულ საზღვრებს სცდება. „ალ-ჯაზირას“ ციფრული გამოძიების ჯგუფმა სატელიტური სურათების, გეოგრაფიული საინფორმაციო სისტემებისა და კონფლიქტების მონაცემთა ბაზების ანალიზით დაადგინა, რომ რეალური სამხედრო ყოფნა გაცილებით ფართო არეალს მოიცავს, ვიდრე ეს ცეცხლის შეწყვეტის შეთანხმებებშია გაწერილი.

ღაზა: „ყვითელი ხაზის“ მიღმა

ღაზაში კონტროლის ზონა ე.წ. „ყვითელი ხაზით“ განისაზღვრა, რომელიც 2025 წლის 10 ოქტომბრის შეთანხმების ნაწილი იყო. თუმცა, სატელიტური კადრები ადასტურებს, რომ ისრაელის მიერ ადგილზე განთავსებული ბეტონის მარკერები ოფიციალურ ხაზს ხშირად ასობით მეტრით სცდება.

სტატისტიკური მონაცემებით, კონტროლირებადი ტერიტორია ღაზას ჩრდილოეთ ნაწილში 4.7%-ით გაიზარდა და საერთო ფართობის 54.7%-ს მიაღწია. ეს ცვლილება მუდმივი პროცესია: მაგალითად, ნოემბერში მარკერების დასავლეთისკენ გადაწევამ სამხედრო კონტროლის ზონა დამატებით 300 მეტრით გააფართოვა.

სამხრეთ ლიბანი: დემონტაჟი ცეცხლის შეწყვეტის შემდეგ

სამხრეთ ლიბანში ვითარება კიდევ უფრო მასშტაბურია. 2026 წლის აპრილის შეთანხმების მიხედვით, ისრაელის კონტროლის ქვეშ 570 კვ.კმ ტერიტორია მოექცა. ეს საერთო ჯამში, ღაზასა და სირიის ანალოგიურ ზონებზე მეტია.

სატელიტური ანალიზი აჩვენებს, რომ ნგრევა და სამხედრო აქტივობა არ შეჩერებულა ზავის გამოცხადების შემდეგ. ისეთ ქალაქებში, როგორიცაა ზავთარ ალ-შარქია, შენობების დემონტაჟი ოფიციალური საზღვრების მიღმაც განხორციელდა, რაც მიუთითებს იმაზე, რომ სამხედრო მოქმედებები არ შემოიფარგლება მხოლოდ დეკლარირებული პერიმეტრით.

სირია: მუდმივი ბაზები და შეჭრის პრაქტიკა

სირიის შემთხვევაში, ისრაელს ოფიციალური „ყვითელი ხაზი“ არ დაუდგენია. აქ კონტროლი ეფუძნება ჯაბალ ალ-შეიხიდან იარმუქის მდინარემდე განლაგებულ მუდმივ სამხედრო პუნქტებს. გამოძიების თანახმად, ეს პუნქტები ქმნიან დაახლოებით 235 კვ.კმ-იან სამხედრო ზონას.

გარდა ამისა, 2024 წლის დეკემბრიდან 2026 წლის იანვრამდე დაფიქსირდა 800-ზე მეტი სამხედრო შეჭრა ბუფერული ზონის მიღმა. ერთ-ერთი ოპერაცია სირიის ტერიტორიის სიღრმეში 63 კილომეტრამდეც კი შევიდა. ეს მიუთითებს ტაქტიკის ცვლილებაზე: მუდმივი საგუშაგოებიდან ღრმა და დინამიკურ შეჭრებზე გადასვლაზე.