ისრაელის თავდაცვის ძალებმა ლიბანის აღმოსავლეთით, ბექაას ხეობაში მდებარე სოფელ მაშღარაზე მასშტაბური საჰაერო იერიში მიიტანეს. ლიბანის სახელმწიფო საინფორმაციო სააგენტოს ცნობით, თავდასხმას სულ მცირე 12 ადამიანი ემსხვერპლა, დაშავებულთა ზუსტი რაოდენობა კი ამ დრომდე უცნობია.

ადგილზე მყოფი ჟურნალისტების ინფორმაციით, ნახევარი საათის განმავლობაში სოფელში 10-ზე მეტი ავიადარტყმა განხორციელდა. იერიშმა საცხოვრებელი კორპუსები გაანადგურა, ნანგრევებში კი მაშველები ამ დრომდე ეძებენ გადარჩენილებს. დაღუპულთა რიცხვი, სავარაუდოდ, კიდევ გაიზრდება.

ისრაელის სამხედრო კამპანია

ისრაელის თავდაცვის უწყების განცხადებით, ბექაას ხეობასა და სამხრეთ ლიბანში ერთდროულად 100-ზე მეტი სამიზნე განადგურდა. ოფიციალური თელ-ავივის მტკიცებით, სამიზნეები „ჰეზბოლას“ ინფრასტრუქტურასა და მებრძოლებს წარმოადგენდნენ.

ეს თავდასხმები პრემიერ-მინისტრ ბენიამინ ნეთანიაჰუს მიერ გაცემული ბრძანების ნაწილია. ნეთანიაჰუმ „ჰეზბოლას“ წინააღმდეგ ოპერაციების გამკაცრების ნებართვა გასცა, რამაც აშშ-ის შუამავლობით მიღწეული ცეცხლის შეწყვეტის შეთანხმება, რომელიც გასულ თვეში ამოქმედდა, უკიდურესად დაძაბა.

სამხედრო ზეწოლა და ევაკუაცია

ექსპერტების შეფასებით, ისრაელი ცდილობს შეცვალოს უსაფრთხოების არსებული ვითარება. მიზანი „ჰეზბოლას“ იძულებაა, შეწყვიტოს დრონებით თავდასხმები ისრაელის პოზიციებზე, როგორც ჩრდილოეთ ისრაელში, ისე ოკუპირებულ სამხრეთ ლიბანში.

ვითარება უკიდურესად დაძაბულია ქვეყნის სამხრეთითაც. არნოუნის, იოჰმორ ალ-შაქიფისა და მაიფადუნის დასახლებები მძიმე არტილერიის ცეცხლის ქვეშაა. ისრაელის არმიამ ქალაქ ნაბატიეს მცხოვრებლებს ევაკუაციისკენ მოუწოდა და გააფრთხილა, რომ ზაჰრანის მდინარის ჩრდილოეთით გადასულიყვნენ.

„ვინც ჰეზბოლას წევრებთან ან მათ სამხედრო ობიექტებთან ახლოს იმყოფება, საკუთარ სიცოცხლეს რისკის ქვეშ აყენებს“, - ნათქვამია ისრაელის სამხედრო სპიკერის, ავიჩაი ადრაის განცხადებაში.

ლიბანის ჯანდაცვის სამინისტროს მონაცემებით, მიმდინარე კონფლიქტის დაწყებიდან დღემდე ქვეყანაში 3100-ზე მეტი ადამიანი დაიღუპა, დაჭრილთა რაოდენობამ კი 9600-ს გადააჭარბა. იძულებით გადაადგილებულ პირთა რიცხვი უკვე მილიონს აჭარბებს.