Starbucks-ის კორეულ წარმომადგენლობაში გაყიდვების „ძალიან მნიშვნელოვანი“ კლება ფიქსირდება. კომპანიის წინააღმდეგ მიმართული საზოგადოებრივი პროტესტი მარკეტინგულმა კამპანიამ გამოიწვია, რომელიც სოციალურ ქსელებში „Tank Day“-ის სახელით გახდა ცნობილი.

სკანდალი უკავშირდება 18 მაისს, გვანჯუს აჯანყების წლისთავს. ეს არის თარიღი, როდესაც 1980 წელს სამხედრო ხუნტამ დემოკრატიული მოძრაობის ჩასახშობად ქალაქში ტანკები და შეიარაღებული ძალები შეიყვანა. კამპანიის შინაარსმა, რომელიც ამ ტრაგიკულ მოვლენებს უკავშირდება, სამხრეთ კორეელების მწვავე უკმაყოფილება გამოიწვია.

პასუხისმგებლობა და ბოდიში

Shinsegae Group-ის ხელმძღვანელმა, ჩუნგ იონგ-ჯინმა, საგანგებო პრესკონფერენციაზე საჯაროდ მოიხადა ბოდიში. მან აღიარა, რომ კამპანიამ ღრმა ტკივილი მიაყენა დაღუპულთა ოჯახებსა და საზოგადოებას. ჩუნგმა ხაზგასმით აღნიშნა, რომ მთელ პასუხისმგებლობას მენეჯმენტი იღებს და მოუწოდა მოქალაქეებს, ბრაზი რიგით თანამშრომლებზე არ გადმოანთხიონ.

„მე სერიოზულად აღვიქვამ იმ ფაქტს, რომ ბევრმა ადამიანმა განიცადა ტკივილი და ბრაზი Starbucks Korea-ს შეუსაბამო მარკეტინგული კამპანიის გამო. მე ვიღებ სრულ პასუხისმგებლობას ამ ინციდენტზე“, - განაცხადა ჩუნგ იონგ-ჯინმა.

სკანდალის საპასუხოდ, კომპანიამ Starbucks Korea-ს ხელმძღვანელი თანამდებობიდან გაათავისუფლა. ასევე დაწყებულია შიდა მოკვლევა იმის დასადგენად, იყო თუ არა მარკეტინგული გუნდის ქმედება განზრახ დაცინვა, თუ გაუაზრებელი შეცდომა.

ბოიკოტი და სამთავრობო რეაქცია

სკანდალმა მასშტაბური ბოიკოტის ტალღა გამოიწვია. სამხრეთ კორეის მთავრობის წარმომადგენლებმა განაცხადეს, რომ Starbucks-ის პროდუქციას აღარ გამოიყენებენ ოფიციალურ ღონისძიებებზე. შინაგან საქმეთა მინისტრმა იუნ ჰო-ჯუნგმა კომპანიის ქმედებას „ანტიისტორიული“ უწოდა.

პრეზიდენტმა ლი ჯე მიონგმა სოციალურ ქსელ X-ში დაწერა, რომ კამპანია იყო „არაჰუმანური და სამარცხვინო საქციელი იაფფასიანი მოგების მაძიებლების მხრიდან, რომლებიც უარყოფენ დემოკრატიულ ღირებულებებსა და ადამიანის უფლებებს“.

ამ დროისთვის შიდა მოკვლევა გრძელდება. კომპანიის განცხადებით, თუ დადასტურდება, რომ თანამშრომლები განზრახ ცდილობდნენ პროტესტის მონაწილეების დაცინვას, ისინი მკაცრად დაისჯებიან. პარალელურად, პოლიციაც აწარმოებს მოკვლევას.