ოკუპირებულ დასავლეთ სანაპიროზე, ქალაქ ჰებრონში, ისრაელის სამხედროების მიერ გახსნილ ცეცხლს 7 თვის სამი აბუ ჰაიკალი ემსხვერპლა. შემთხვევა გასულ პარასკევს მოხდა, როდესაც ოჯახი ავტომობილით გადაადგილდებოდა.

ბავშვი მანქანის უკანა სავარძელზე, დედასთან, 28 წლის დანია სალამესთან და 11 წლის ძმასთან, კინანთან ერთად იჯდა. მამა, 41 წლის ფაჰდ აბუ ჰაიკალი, საკუთარ დედას, 61 წლის ფერიალს, სახლში აცილებდა.

როდესაც ოჯახი თელ-რუმეიდას უბანს მიუახლოვდა, გზაზე ჯარისკაცების ჯგუფი გამოჩნდა. ფაჰდმა მანქანა გააჩერა და ხელები მაღლა ასწია, თუმცა მიუხედავად იმისა, რომ ოჯახი საფრთხეს არ წარმოადგენდა, ერთ-ერთმა სამხედრომ ცეცხლი გახსნა. ტყვიამ საქარე მინა გახვრიტა, მამას ხელი დაუზიანა და უკანა სავარძელზე მჯდომ ჩვილს პირდაპირ სახეში მოხვდა. ბავშვი ადგილზე გარდაიცვალა.

იგივე ტყვია ჩვილის შემდეგ დედას, დანია სალამეს მოხვდა. ნამსხვრევი ქალის გულთან ახლოს, სისხლძარღვთან გაიჭედა. ექიმებმა ოპერაციაზე უარი თქვეს, რადგან ნამსხვრევის ამოღება სასიცოცხლოდ სახიფათოა. ფაჰდმა მეუღლეს შვილის გარდაცვალების ამბავი მხოლოდ ერთი დღის შემდეგ შეატყობინა.

„ჯარისკაცებმა დახმარება არ გაგვიწიეს, უბრალოდ გაეცალნენ ტერიტორიას. ჩვენ მოგვკლეს განზრახ,“ - აცხადებს ფაჰდი. მისი თქმით, სამხედროებმა შემთხვევის ადგილზე არსებული სათვალთვალო კამერების ჩანაწერები ამოიღეს, თუმცა გამოძიების შესახებ ოჯახისთვის არავის უცნობებია. ოჯახი სამართლებრივი დავის დაწყებას გეგმავს, თუმცა დიდი იმედი არ აქვთ.

ბებია, ფერიალი, რომელიც შემთხვევის დროს მანქანაში იყო, იხსენებს: „როცა გასროლის ხმა გავიგე, მეგონა აფრთხილებდნენ, მაგრამ მერე დავინახე, რომ ტყვია მანქანაში შემოვიდა. ბავშვის სახეზე სისხლი რომ დავინახე, გონება დავკარგე.“

ჰებრონი დასავლეთ სანაპიროზე ერთ-ერთი ყველაზე დაძაბული ადგილია. 2023 წლის 7 ოქტომბრის შემდეგ, ისრაელის ძალებმა ქალაქში კონტროლი კიდევ უფრო გაამკაცრეს. ადგილობრივი აქტივისტები, მათ შორის ისა ამრო, აცხადებენ, რომ თელ-რუმეიდას უბანი ფაქტობრივად ბლოკადაშია მოქცეული. მოსახლეობა მუდმივ შიშში ცხოვრობს და თავს დაუცველად გრძნობს, რადგან მსგავსი ინციდენტები რეგიონში უკვე გახშირდა.