ვაშინგტონში, თეთრი სახლის სამხრეთ გაზონზე, ისტორიული და უპრეცედენტო სპორტული ღონისძიება იგეგმება. აშშ-ის პრეზიდენტი დონალდ ტრამპი 80 წლის იუბილესა და დამოუკიდებლობის დეკლარაციის ხელმოწერის 250 წლისთავს UFC-ის (Ultimate Fighting Championship) ბრძოლებით აღნიშნავს.

სპეციალურად მოწყობილ „ოქტაგონში“ 14 შერეული ორთაბრძოლების (MMA) მებრძოლი გამოვა. ღონისძიებას, რომელშიც ორი სატიტულო ბრძოლაა გათვალისწინებული, მხოლოდ მოწვეული სტუმრები დაესწრებიან. ჯამში, დაგეგმილია 4 000-მდე დამსწრის მიღება.

ტრამპის კავშირი საბრძოლო სპორტთან ჯერ კიდევ 1980-იანი წლებიდან იწყება, როდესაც იგი პროფესიონალური რესლინგის (WWE) სამყაროში აქტიურად ჩაერთო. ექსპერტები მიიჩნევენ, რომ რესლინგის სცენარული ბუნება და „კეთილი და ბოროტი“ პერსონაჟების დიქოტომია ტრამპისთვის პოლიტიკური იმიჯის შექმნაში ეფექტური აღმოჩნდა.

„რესლინგში სიმართლე ხშირად მეორეხარისხოვანია — ის ისეთი ხდება, როგორიც კონკრეტულ მომენტშია საჭირო. ეს მიდგომა ტრამპის პოლიტიკურ სტილთან ძალიან ახლოსაა“, — აცხადებს მილერსვილის უნივერსიტეტის პროფესორი ლოუერი ვუდალი.

თუმცა, UFC-ის შემთხვევაში აქცენტი შეცვლილია. თუ WWE გასართობი შოუა, UFC რეალური სპორტული კონკურენციაა, რომელიც განსაკუთრებით პოპულარულია ახალგაზრდა მამაკაცებში. პოლიტოლოგ აარონ ეიტინგერის თქმით, ეს არ არის მხოლოდ თეატრალური წარმოდგენა, არამედ პოლიტიკური დღის წესრიგის ნაწილია.

UFC-ის აგრესიული, ძალისმიერი ბუნება პირდაპირ პასუხობს ტრამპისეულ მასკულინურ იმიჯს. ღონისძიების კომენტატორად ჯო როგანია მიწვეული, რომელიც ტრამპის გავლენიანი მხარდამჭერია. ამასთან, აშშ-ის სახელმწიფო მდივანმა მარკო რუბიომ უკვე მოაწერა ხელი შეთანხმებას UFC-ის „სპორტული დიპლომატიის“ ფარგლებში პოპულარიზაციის შესახებ.

მიუხედავად ამისა, ღონისძიებას აკრიტიკებენ. Reuters-Ipsos-ის გამოკითხვის თანახმად, ამერიკელების მხოლოდ 16% მიიჩნევს ღონისძიებას მიზანშეწონილად, ხოლო 46% მას შეუსაბამოდ აფასებს. კრიტიკოსები აღნიშნავენ, რომ ქვეყანაში მიმდინარე ეკონომიკური სირთულეებისა და ირანთან კონფლიქტის ფონზე, თეთრ სახლში „სისხლიანი სპორტის“ მოწყობა არასწორი მესიჯია.

„ეს ჰგავს საზოგადოების ყველაზე მდიდარი და პრივილეგირებული ფენის გართობას სისხლიანი სპორტით, მაშინ როცა ქვეყანა ეკონომიკურ კრიზისს ებრძვის“, — აღნიშნავს ვუდალი.