Crystalbet ეროვნულ საფეხბურთო ლიგაში მოულოდნელი შედეგები გრძელდება. მე-17 ტურის ფარგლებში გამართულ იმერულ დერბიში, ქუთაისის „ტორპედომ“ სტუმრად „სამგურალთან“ წააგო. მატჩი წყალტუბოელთა გამარჯვებით, 2:1 დასრულდა, რაც ქუთაისელებისთვის ზედიზედ მეორე მარცხი აღმოჩნდა.

შეხვედრის დასაწყისიდანვე აქტიურობდნენ სტუმრები, თუმცა ანგარიში „სამგურალმა“ გახსნა. 31-ე წუთზე კლაუდიო სებოლინიამ ბრწყინვალე დარტყმით დააწინაურა მასპინძლები.

მეორე ნახევარი „სამგურალისთვის“ კიდევ უფრო წარმატებული გამოდგა. 52-ე წუთზე ახალგაზრდა მათე შათირიშვილმა საკუთარი სადებიუტო გოლი გაიტანა და უპირატესობა გაზარდა. ქუთაისელებმა მატჩში დაბრუნება 78-ე წუთზე სცადეს, როდესაც კომნენ ანდრიჩმა სხვაობა შეამცირა.

თუმცა, „ტორპედოს“ იმედები ხუთ წუთში გაქრა. სორი მანემ წითელი ბარათი მიიღო და გუნდი რიცხობრივ უმცირესობაში დატოვა. დარჩენილ დროში წყალტუბოელებმა უპირატესობა შეინარჩუნეს და მნიშვნელოვანი სამი ქულა მოიპოვეს.

პარალელურად, წარმატებული საღამო ჰქონდა რუსთავს. „დავით პეტრიაშვილი არენაზე“ გია ცეცაძის გუნდმა სატურნირო ცხრილის აუტსაიდერი „მეშახტე“ მინიმალური ანგარიშით, 1:0 დაამარცხა. შეხვედრის ბედი კაპიტან ავთანდილ გუჯაბიძის მიერ შესრულებულმა 11-მეტრიანმა დარტყმამ გადაწყვიტა, რომელიც იუტა ნაკანოს აქტიურობის შედეგად დაინიშნა.

შეგახსენებთ, რომ მე-17 ტური ხვალ, „გაგრასა“ და თბილისის „დინამოს“ დაპირისპირებით დასრულდება. მატჩი „დავით პეტრიაშვილი არენაზე“ 20:00 საათზე დაიწყება.