სამხრეთ კორეის სამართალდამცავმა ორგანოებმა პოპულარული YouTube არხის, Hover Lab-ის დამფუძნებელი კიმ სე-ი დააკავეს. მას ბრალი ედება ცნობილი მსახიობის, კიმ სუ-ჰიონის რეპუტაციის შელახვაში. გამოძიების თანახმად, იუთუბერმა ხელოვნური ინტელექტი გამოიყენა იმისათვის, რომ მსახიობის წინააღმდეგ ყალბი მტკიცებულებები შეექმნა.

სეულის ცენტრალურმა რაიონულმა სასამართლომ დაკავების ორდერი მას შემდეგ გასცა, რაც გაჩნდა საფრთხე, რომ ეჭვმიტანილი მტკიცებულებებს გაანადგურებდა ან მიიმალებოდა. სკანდალი, რომელმაც კიმ სუ-ჰიონის კარიერა შეაჩერა, ერთი წლის წინ დაიწყო.

ყალბი მტკიცებულებები და ციფრული ფაბრიკაცია

Hover Lab-მა, რომელსაც თითქმის მილიონი გამომწერი ჰყავს, გაავრცელა აუდიოჩანაწერი, სადაც მსახიობი კიმ საე-რონი ამტკიცებდა, რომ კიმ სუ-ჰიონთან ურთიერთობა ჯერ კიდევ სკოლის პერიოდიდან ჰქონდა. პოლიციის ექსპერტიზამ დაადასტურა, რომ ჩანაწერი ხელოვნური ინტელექტით იყო გენერირებული.

გარდა ამისა, გამოძიების ცნობით, იუთუბერმა მანიპულაცია მოახდინა ტექსტური შეტყობინებების სქრინშოტებზეც, რათა შეექმნა ილუზია მსახიობებს შორის არსებული პირადი კავშირის შესახებ. კიმ სუ-ჰიონი აღნიშნულ ბრალდებებს თავიდანვე უარყოფდა.

"გამოძიებამ დაადასტურა, რომ Hover Lab-ის მიერ წამოყენებული ყველა ეჭვი და მტკიცებულება უსაფუძვლო იყო", - ნათქვამია მსახიობის სააგენტოს განცხადებაში.

კარიერის კრახი და სამართლებრივი ბრძოლა

ცრუ ბრალდებებმა სერიოზული დარტყმა მიაყენა კიმ სუ-ჰიონის როგორც პროფესიულ, ისე პირად ცხოვრებას. პოლიციის მონაცემებით, მსახიობმა დაკარგა შემოსავლის წყაროები და დღემდე გადის ფსიქიატრიულ მკურნალობას. 2025 წლის მარტში გამართულ პრესკონფერენციაზე მსახიობმა ცრემლიანი თვალებით განაცხადა, რომ სრულიად უდანაშაულოა.

კიმ სუ-ჰიონმა პირობა დადო, რომ სიმართლეს დაამტკიცებდა და სასამართლოში სარჩელები შეიტანა როგორც იუთუბერის, ისე მსახიობის ოჯახის წინააღმდეგ. მისი სააგენტოს თქმით, გასული წელი მთლიანად ამ პირობის შესრულებას მიეძღვნა.

დაკავებამდე ცოტა ხნით ადრე, იუთუბერმა კიმ სე-იმ უარყო ბრალდებები და განაცხადა, რომ დაკავების ორდერი სამართლებრივად არ იყო გამართული. მან პირობა დადო, რომ პოლიციისა და პროკურატურის წინააღმდეგ საჩივრებს შეიტანს.