ბიტკოინის Spot ETF-ებიდან კაპიტალის გადინება გრძელდება. SoSoValue-ს მონაცემებით, 5 ივნისს დასრულებულ კვირაში ფონდებმა 1.72 მილიარდი დოლარის წმინდა გადინება დააფიქსირეს. ეს უკვე მეოთხე კვირაა, რაც ბაზარი ასეთ მასშტაბურ „გამოსყიდვებს“ განიცდის.

Farside Investors-ის მონაცემებით, ყველაზე დიდი წნეხი ივნისის პირველ სამ დღეს მოვიდა, როდესაც ფონდებიდან შესაბამისად 483.8, 519.1 და 396.6 მილიონი დოლარი გავიდა. მცირე გამონაკლისი იყო ხუთშაბათი, როდესაც 3.2 მილიონი დოლარის შემოდინება დაფიქსირდა, თუმცა პარასკევს კვლავ 325.7 მილიონი დოლარის გადინება აღირიცხა.

ყველაზე დიდი დანაკარგი BlackRock-ის iShares Bitcoin Trust-ს (IBIT) ჰქონდა, საიდანაც 1.34 მილიარდი დოლარი გავიდა. Fidelity-ს Wise Origin Bitcoin Fund-მა (FBTC) 201.9 მილიონი დოლარი დაკარგა, ხოლო Grayscale-ის (GBTC) მაჩვენებელმა 144.3 მილიონი დოლარი შეადგინა.

რატომ ხდება კაპიტალის გადინება?

Altura DeFi-ს ოპერაციული დირექტორი მეთიუ პინოკი განმარტავს, რომ ეს პროცესი არა ბიტკოინის სპეციფიკურ პრობლემებს, არამედ „მაკროეკონომიკურ რისკებს“ უკავშირდება. მისი თქმით, დიდი ინვესტორები პორტფელების რისკების კორექტირებისას სწორედ ყველაზე ლიკვიდურ პროდუქტებს იყენებენ, ამიტომაც მოხვდა დარტყმა IBIT-ზე.

პინოკის განცხადებით, ეს ტენდენცია აშშ-ის დასაქმების მონაცემებს, სახაზინო ვალდებულებების შემოსავლიანობის ზრდას და საპროცენტო განაკვეთების შემცირების მოლოდინების შემცირებას უკავშირდება, რასაც რეგიონული კონფლიქტებიც ამძაფრებს.

ეთერიუმი და ალტკოინები

გადინება მხოლოდ ბიტკოინს არ შეხებია. ეთერიუმის (Ether) ETF-ებიდან 5 ივნისის ჩათვლით 173.05 მილიონი დოლარი გავიდა. ბოლო ოთხი კვირის განმავლობაში ეთერიუმის ფონდებმა ჯამში 885.6 მილიონი დოლარი დაკარგეს.

სხვა ალტკოინების შემთხვევაში სურათი განსხვავებულია: HYPE ETF-ებმა 16.65 მილიონი დოლარის შემოდინება დააფიქსირეს, ხოლო XRP-ის ფონდებში 2.62 მილიონი დოლარი შევიდა. ამავე პერიოდში, Solana-ს ETF-ებიდან 6.52 მილიონი დოლარი გავიდა.