კრიპტოვალუტის ბაზრისთვის მიმდინარე კვირა განსაკუთრებით მძიმე გამოდგა. ფასების მკვეთრმა ვარდნამ არა მხოლოდ მოგება შეამცირა, არამედ ინვესტორებს უზარმაზარი ფინანსური ზარალი მოუტანა. CoinGlass-ის მონაცემებით, ორშაბათიდან დღემდე ბაზარზე 5,3 მილიარდი დოლარის ღირებულების „გრძელი“ (long) პოზიცია ლიკვიდირდა.

მხოლოდ პარასკევის განმავლობაში ლიკვიდაციებმა 1,4 მილიარდი დოლარი შეადგინა. ბიტკოინი (BTC) 60 000$-იან ნიშნულს ჩამოსცდა, რასაც ალტკოინების კიდევ უფრო მასშტაბური გაუფასურება მოჰყვა. ბაზრის ასეთი მასშტაბური „წმენდა“ ბოლოს იანვრის ბოლოსა და თებერვლის დასაწყისში შეინიშნებოდა, როდესაც ბიტკოინის კურსი ერთ კვირაში 90 000$-დან 60 000$-მდე დაეცა.

რა ხდება ბაზარზე?

ანალიტიკოსები აღნიშნავენ, რომ მსგავსი ლიკვიდაციური კასკადები ხშირად ბაზრის „კაპიტულაციის“ პერიოდს ნიშნავს. ეს არის მომენტი, როდესაც სისტემიდან ჭარბი ბერკეტი (leverage) იწმინდება და სუსტი მოთამაშეები იძულებულნი არიან, პოზიციები დახურონ.

ამ ეტაპზე გაურკვეველია, არის თუ არა ეს ვარდნა საბაზრო ფსკერი, თუ ბაზარი კიდევ უფრო დაბალ ნიშნულებს შეეხება. თუმცა, 60 000$-ის ქვემოთ უკვე გამოჩნდნენ მყიდველები, რომლებიც აქტივების შესყიდვას ცდილობენ.

სისტემური ზეწოლა

ბაზარზე არსებულ ნეგატიურ ფონს ამძაფრებს ტექნიკური პრობლემებიც, მათ შორის Zcash-ის ქსელში აღმოჩენილი ხარვეზი. ინვესტორები ასევე ელოდებიან აშშ-ის შრომის ბაზრის მონაცემებს, რამაც დამატებითი გაურკვევლობა შეიტანა ვაჭრობაში.

ინვესტორებისთვის ამჟამინდელი სიტუაცია ტესტია, რამდენად მდგრადია მათი პორტფელები მაღალი ვოლატილობის პირობებში. მოკლევადიან პერსპექტივაში ბაზარზე კვლავ მაღალი რყევებია მოსალოდნელი.