საფრანგეთში დაფუძნებულმა კომპანია Capital B-მ, რომელიც ბიტკოინის აქტივების მართვაზეა ორიენტირებული, ახალი კაპიტალის მოზიდვის გეგმა დაამტკიცა. აქციონერთა 95%-ზე მეტმა მხარი დაუჭირა 120,4 მილიარდ დოლარამდე (105 მილიარდი ევრო) დაფინანსების მექანიზმების ამოქმედებას.

აღნიშნული რესურსი კომპანიას დაეხმარება, კიდევ უფრო აგრესიულად გააგრძელოს ბიტკოინის შესყიდვის სტრატეგია. მიზანია დროთა განმავლობაში თითოეულ აქციაზე ბიტკოინის წილის მაქსიმალური ზრდა.

კომპანიის ოფიციალური განცხადების თანახმად, დაფინანსება ორ ნაწილად გაიყოფა: 5 მილიარდ ევრომდე კაპიტალის გაზრდა და 100 მილიარდ ევრომდე საკრედიტო ინსტრუმენტების გამოშვება. ამ გადაწყვეტილებასთან ერთად, აქციონერებმა კომპანიის რებრენდინგიც დაამტკიცეს — „The Blockchain Group“-ი ოფიციალურად გახდა „Capital B“.

ამჟამად Capital B ევროპაში სიდიდით მეორე ბიტკოინის საცავის მფლობელი კომპანიაა. მას ბალანსზე 3 139 BTC აქვს, რომლის საბაზრო ღირებულება დაახლოებით 200 მილიონი დოლარია. პირველ ადგილს გერმანული Bitcoin Group SE იკავებს 3 604 BTC-ით.

თუმცა, აღსანიშნავია, რომ ყველა კომპანია ერთსა და იმავე გზას არ ადგას. მაგალითად, ფრანგულმა Sequans Communications-მა მაისის ბოლოს განაცხადა, რომ წყვეტს თავის კრიპტო-სტრატეგიას და არსებულ მარაგებს 658 ბიტკოინს ეტაპობრივად გაყიდის. ბაზარზე ამ გადაწყვეტილებას დადებითი რეაქცია მოჰყვა, რამაც კომპანიის აქციების ფასი 14,5%-ით გაზარდა.

Capital B-ს მიერ დაგეგმილი მასშტაბური ემისიები სააქციო კაპიტალის სერიოზულ განზავებას გამოიწვევს. თუ კომპანია მაქსიმალურ დასაშვებ რაოდენობას — 125 მილიარდ ახალ აქციას გამოუშვებს, არსებული აქციონერების წილი კომპანიაში შესაძლოა 0,24%-მდე შემცირდეს.