Adobe-მა საკუთარი ხელოვნური ინტელექტის ასისტენტის, Firefly-ის შესაძლებლობები მნიშვნელოვნად გააფართოვა. კომპანიამ დაადასტურა, რომ ინსტრუმენტი უკვე ინტეგრირებულია ისეთ საკვანძო პროგრამებში, როგორიცაა Premiere Pro, Illustrator, InDesign და Frame.io.
განახლებული ასისტენტი მომხმარებლებს სთავაზობს ბრენდ-ქითების, პროდუქტის ვიდეოებისა და სთორიბორდების შექმნის გამარტივებულ გზებს. Firefly-ის აპლიკაციაში დამატებულია ფუნქცია, რომელიც შექმნილ ელემენტებს ინახავს და მათი გამოყენება სხვადასხვა პროექტში თავისუფლად არის შესაძლებელი.
Premiere-ის მომხმარებლებისთვის AI ასისტენტი ყოველდღიურ რუტინას ამარტივებს: ის ავტომატურად ახარისხებს ფაილებს, ახორციელებს კლიპების ჯგუფურ გადარქმევას, ამოიცნობს ინტერვიუს კითხვებს და ამატებს მარკერებს. Illustrator-ში კი ასისტენტი ფენების (layers) რეორგანიზაციასა და დაკარგული ფონტების იდენტიფიცირებაში გვეხმარება.
Adobe აშკარად ცდილობს, Firefly-ის ფუნქციონალი მაქსიმალურად მიუახლოვოს Canva-ს ტიპის პლატფორმებს, სადაც ვიზუალური კონტენტის გენერაცია სწრაფად და მარტივად ხდება. ახალი „Elements“ ფუნქცია მომხმარებლებს საშუალებას აძლევს, შეინახონ AI-ს მიერ გენერირებული პერსონაჟები, ობიექტები და ლოკაციები სამომავლო გამოყენებისთვის.
კომპანიამ ასევე წარადგინა „Projects“ ფუნქცია, რომელიც გუნდური მუშაობისთვის არის განკუთვნილი. ის საშუალებას იძლევა, ყველა აქტივი ერთ სივრცეში მოიყაროს თავი, რაც განსაკუთრებით მოსახერხებელია მასშტაბური კამპანიების ან ვიდეო სერიების წარმოებისას. აღნიშნული ფუნქციები ამჟამად დახურულ ბეტა რეჟიმშია ხელმისაწვდომი.
Firefly უკვე მუშაობს Adobe Express-თან, Photoshop-თან და Acrobat-თან, ასევე მხარდაჭერილია ChatGPT-ის, Claude-ისა და Copilot-ის მიერ. უახლოეს მომავალში Adobe Google Gemini-სა და Slack-ის ინტეგრაციასაც გეგმავს. კომპანიის გრძელვადიანი მიზანია შექმნას ერთიანი AI ასისტენტი, რომელიც Adobe-ის ყველა აპლიკაციას შორის ჰარ შორის შეუფერხებლად იმუშავებს.
დისკუსია
0 კომენტარი
ჯერ კომენტარი არ არის — იყავი პირველი.