გადახდების პლატფორმა MassPay-მ და კრიპტოვალუტის ბირჟამ Coinbase-მა სტრატეგიული პარტნიორობა გამოაცხადეს. თანამშრომლობის მიზანი სტეიბლკოინებზე დაფუძნებული ტრანსსასაზღვრო გადახდების მასშტაბირებაა.

ახალი ინფრასტრუქტურა აერთიანებს MassPay-ს ქსელს, რომელიც 180 ქვეყანას მოიცავს, და Coinbase-ის ტექნოლოგიურ ბაზას. ეს მომხმარებლებს საშუალებას აძლევს, მარტივად განახორციელონ ოპერაციები ფიატურ ვალუტებს, USDC-სა და სხვა ციფრულ აქტივებს შორის.

MassPay-ს აღმასრულებელი დირექტორის, რან გრუშკოვსკის განცხადებით, მიუხედავად იმისა, რომ სტეიბლკოინები კომპანიის ტრანზაქციების მოცულობაში ჯერ კიდევ მცირე წილს იკავებს, ახალი სისტემის მეშვეობით პირველ წელსვე ცხრანიშნა მოგების მიღებას ელიან.

პარტნიორობის ფარგლებში, Coinbase უზრუნველყოფს საფულეების ინფრასტრუქტურას, აქტივების შესანახად საჭირო სერვისებსა და ბლოკჩეინზე დაფუძნებულ ანგარიშსწორებას. თავის მხრივ, MassPay პასუხისმგებელია გადახდების ე.წ. „ბოლო მილზე“ — საბანკო გადარიცხვებზე, მობილურ საფულეებსა და ციფრული აქტივების არხებზე.

კომპანიებს შორის განაწილებულია მარეგულირებელი ვალდებულებებიც: Coinbase უზრუნველყოფს ლიცენზირებულ ინფრასტრუქტურას, ხოლო MassPay მართავს მომხმარებელთა იდენტიფიკაციის (KYC) პროცესებს, სანქციების შემოწმებასა და საგადასახადო დოკუმენტაციას.

გრუშკოვსკის თქმით, ახალი სისტემა ტრადიციულ საერთაშორისო გადარიცხვებთან შედარებით ხარჯებს 40%-დან 70%-მდე ამცირებს. ამასთან, ანგარიშსწორება, რომელიც ადრე დღეებს საჭიროებდა, ახლა თითქმის მყისიერად ხორციელდება.

აღნიშნული ინიციატივა გლობალურ ტენდენციას ეხმიანება, სადაც საფინანსო ინფრასტრუქტურის მსხვილი მოთამაშეები აქტიურად ნერგავენ სტეიბლკოინებს. მაგალითად, Stripe-მა 2025 წლის თებერვალში შეიძინა სტარტაპი Bridge, ხოლო Circle-მა აპრილში ჩაუშვა Circle Payments Network, რომელიც ბანკებსა და ელექტრონულ საფულეებს რეალურ დროში ანგარიშსწორების საშუალებას აძლევს.