ოსკაროსანი მსახიობი ლუპიტა ნიონგო კრისტოფერ ნოლანის მომავალ ფილმში, „ოდისეაში“, ჰელენ ტროელის როლს მოირგებს. მითოლოგიური პერსონაჟის განსახიერებამ, რომლის სილამაზემაც, ლეგენდის თანახმად, ტროას ომი გამოიწვია, საზოგადოებაში მწვავე დებატები და კულტურული დაპირისპირება წარმოშვა.
კრიტიკოსების ნაწილი მიიჩნევს, რომ შავკანიანი მსახიობის შერჩევა ევროპული მითოლოგიური ფიგურის როლზე შეუსაბამოა. ამ მოსაზრებას ღიად დაუჭირა მხარი ილონ მასკმაც, რომელმაც ნოლანის არჩევანი გააკრიტიკა და სოციალურ ქსელ X-ზე რეჟისორი „ანტითეთრკანიან რასიზმში“ დაადანაშაულა.
Elle-თან ინტერვიუში ნიონგომ კრიტიკაზე საპასუხოდ აღნიშნა, რომ ფოკუსირებას თავდაცვაზე არ აპირებს. „მე სრულად ვუჭერ მხარს კრისის ჩანაფიქრს და იმ ვერსიას, რომელსაც ის ყვება. ჩვენი მსახიობთა გუნდი სამყაროს ასახავს“, — განაცხადა მსახიობმა.
მითოლოგია და თანამედროვეობა
ნიონგოს თქმით, „ოდისეა“ იმდენად მასშტაბური ნაწარმოებია, რომ ის სხვადასხვა სამყაროს აერთიანებს. მისი აზრით, სწორედ ეს ხსნის მსახიობთა მრავალფეროვან შემადგენლობას, რომელშიც ისეთი ვარსკვლავები შედიან, როგორებიც არიან მეთ დეიმონი, ტომ ჰოლანდი, ენ ჰეთეუეი, ზენდაია და შარლიზ ტერონი.
„ეს მითოლოგიური ისტორიაა და მე არ ვაპირებ დროს თავდაცვაზე ვხარჯავდე. კრიტიკა მაინც იარსებებს, მიუხედავად იმისა, ჩავერთვები თუ არა დისკუსიაში“, — დასძინა ნიონგომ.
კრიტიკის ტალღა
ილონ მასკის რეაქცია ნოლანის ფილმის ქასთინგზე საკმაოდ მწვავე აღმოჩნდა. მან განაცხადა, რომ რეჟისორმა „ბერძენ ხალხს შეურაცხყოფა მიაყენა“. მასკის თქმით, ფუნდამენტურ ევროპულ ლიტერატურულ ნაწარმოებში შავკანიანი მსახიობის დანიშვნა ისეთივე შეცდომაა, როგორც შაკა ზულუს როლზე თეთრკანიანი მსახიობის დამტკიცება.
კრისტოფერ ნოლანს, რომელიც ჰოლივუდის ერთ-ერთი ყველაზე გავლენიანი რეჟისორია, კრიტიკაზე ოფიციალური პასუხი ჯერ არ გაუცია. ფილმი „ოდისეა“ კინოთეატრებში 17 ივლისს გამოდის და ის ჰომეროსის ეპიკური პოემის ახალ ინტერპრეტაციას წარმოადგენს.
დისკუსია
0 კომენტარი
ჯერ კომენტარი არ არის — იყავი პირველი.