პოპულარული ავსტრალიური რეალითი შოუს, Married at First Sight Australia-ს მონაწილეები აცხადებენ, რომ პროექტის პროდიუსერებმა მათ უსაფრთხოება არ უზრუნველყვეს. BBC-ის მიერ ჩატარებულმა გამოძიებამ ცხადყო, რომ შოუს არაერთ მონაწილეს შეუწყვილეს ადამიანები, რომლებსაც კრიმინალური წარსული ჰქონდათ, თუმცა ამის შესახებ მეორე მხარეს არაფერი უთხრეს.

ერთ-ერთი მონაწილე, სიერა სვეპსტოუნი, რომელიც გასული წლის სეზონში მონაწილეობდა, ჰყვება, რომ მხოლოდ შოუს დასრულების შემდეგ შეიტყო იმის შესახებ, რომ მის პარტნიორს, ბილი ბელჩერს, ნარკოტიკულ დანაშაულებთან დაკავშირებით ნასამართლეობა ჰქონდა.

Sierah Swepstone

სვეპსტოუნის თქმით, შოუს მონაწილეებს უნდა ჰქონდეთ „ინფორმირებული თანხმობის“ უფლება. ის მიიჩნევს, რომ პროდიუსერებმა მონაწილეები საფრთხის ქვეშ დააყენეს, როდესაც მათ უცხო ადამიანებთან ერთად ჩაკეტილ სივრცეში აცხოვრებდნენ, ისე რომ მათი წარსულის შესახებ არ გაუფრთხილებიათ.

კიდევ ერთმა მონაწილემ, რომელმაც ანონიმურობა არჩია და თავს „ანა“ უწოდა, განაცხადა, რომ მთელი გადაღებების განმავლობაში შიშში ცხოვრობდა. ანას თქმით, მისი პარტნიორი გამოირჩეოდა აგრესიული ქცევით, ხშირად ყვიროდა და ნივთებსაც ესროდა. ამ ფაქტების შესახებ BBC-მ დამატებითი მტკიცებულებებიც მოიპოვა, მათ შორის ფოტომასალა, სადაც მონაწილეს დაზიანებები აღენიშნება.

შოუს სხვა მონაწილეებს შორის აღმოჩნდნენ ისეთებიც, ვისაც ნასამართლეობა ჰქონდათ ძალადობის ან ნარკოტიკების მოხმარების გამო. მაგალითად, 2025 წლის სეზონის მონაწილე ადრიან არაზუს, როგორც BBC-მ გაარკვია, საზოგადოებრივი წესრიგის დარღვევისთვის (affray) ჰქონდა ნასამართლეობა, ხოლო ტიმოთი სმიტი, რომელიც 2024 წლის სეზონში მონაწილეობდა, წარსულში ნარკოტიკებით ვაჭრობისთვის იყო ნასამართლევი.

არხმა Channel 9-მ და საპროდიუსერო კომპანია Endemol Shine Australia-მ ერთობლივ განცხადებაში აღნიშნეს, რომ მათ აქვთ „მკაცრი პროტოკოლები“, რომლებიც მონაწილეთა უსაფრთხოებას უზრუნველყოფს. თუმცა, მათ არ უპასუხეს პირდაპირ კითხვას, თუ რატომ არ აცნობეს მონაწილეებს მათი პარტნიორების კრიმინალური ისტორიის შესახებ.

ყოფილი მონაწილეები, მათ შორის ქეით ჯონსტონი და ტაჰნი კუკი, მოუწოდებენ შოუს შემქმნელებს, გაამკაცრონ ფონის შემოწმების პროცედურები. მათი თქმით, უსაფრთხოების შემოწმება არ უნდა იყოს მხოლოდ ფორმალური პროცესი და მონაწილეებს აუცილებლად უნდა მიეწოდოთ ინფორმაცია, თუ ვისთან ერთად უწევთ ცხოვრება.

Katie Johnstone