არაბთა გაერთიანებულმა საამიროებმა ოფიციალურად უარყო მედიაში გავრცელებული ინფორმაცია, რომლის თანახმად, ქვეყანამ ირანისთვის მილიარდობით დოლარის გაყინული აქტივების განბლოკვაზე თანხმობა განაცხადა. საგარეო საქმეთა სამინისტროს განცხადებით, ეს ცნობები საფუძველს მოკლებულია.

„სამინისტრო ადასტურებს, რომ ეს ბრალდებები სრულიად ცრუ და უსაფუძვლოა. არცერთი გაყინული ირანული სახსარი არ განთავისუფლებულა, არ გადარიცხულა და არც საამიროების გავლით გასულა“, — ნათქვამია მთავრობის ოფიციალურ განცხადებაში.

რა იყო გავრცელებული ინფორმაციის საფუძველი?

მანამდე, სააგენტო Reuters-მა, ოთხ უსახელო წყაროზე დაყრდნობით გაავრცელა ინფორმაცია, რომ საამიროებმა ტაქტიკური მანევრი განახორციელეს. გავრცელებული ცნობებით, ეს ნაბიჯი იყო პასუხი ირანის მხრიდან სამხედრო ობიექტებზე განხორციელებულ თავდასხმებზე, რომლებიც თებერვლის ბოლოს, აშშ-ის ჩართულობით დაწყებული კონფლიქტის შემდეგ დაიწყო.

ზოგიერთი წყაროს მტკიცებით, საუბარი იყო 10 მილიარდი დოლარის განბლოკვაზე, საიდანაც 3 მილიარდი უკვე გადაცემული იყო. სხვა წყაროები კი საერთო თანხას 20 მილიარდ დოლარად აფასებდნენ. თუმცა, ოფიციალური აბუ-დაბი ამ ვერსიებს კატეგორიულად უარყოფს.

ფინანსური დერეფანი და სანქციები

აშშ-ის ანალიტიკური ცენტრის, Atlantic Council-ის შეფასებით, დუბაი წლების განმავლობაში ირანული ბიზნესისთვის მნიშვნელოვან ფინანსურ კორიდორად რჩებოდა. დასავლური სანქციების გვერდის ავლით, ირანული მხარე ახერხებდა ნავთობის რეალიზაციას და მიღებული თანხების სამხედრო პროგრამებისა და რეგიონული დაჯგუფებების დასაფინანსებლად მიმართვას.

საამიროებში რეგისტრირებული „ჩრდილოვანი“ კომპანიები ხშირად ფარავდნენ ირანული ნავთობისა და პროდუქციის წარმომავლობას. პარალელურად, არაფორმალური ვალუტის გადამცვლელი პუნქტები ახდენდნენ სახსრების ტრანსფერს ისე, რომ ისინი საბანკო ზედამხედველობის მიღმა რჩებოდა.

ამერიკის შეერთებული შტატები დიდი ხანია მოუწოდებს საამიროებს ამ ქსელების დემონტაჟისკენ. აშშ-ის ხაზინამ ბოლო წლებში სანქციები დაუწესა საამიროებში დაფუძნებულ არაერთ სუბიექტს, თუმცა, ვაშინგტონის შეფასებით, ამ მიმართულებით ადგილობრივი კონტროლი კვლავ არასაკმარისია.