2025 წლის 4 ოქტომბერს პრეზიდენტის ადმინისტრაციის შენობის ხელში ჩაგდების მცდელობის საქმეზე დაკავებული პირების გათავისუფლება გრძელდება. 10 ივნისს პატიმრობიდან კიდევ 14 ბრალდებული გათავისუფლდა, მანამდე, 9 ივნისს კი — 8 პირი. ყველა მათგანი საპროცესო შეთანხმების საფუძველზე გათავისუფლდა და სასამართლო განაჩენს მოლოდინის რეჟიმში გაივლიან.

გათავისუფლებულთა შორისაა 14 პირი: გურიელ ქარდავა, ალექსანდრე ხაბეიშვილი, ბექა კელეხსაშვილი, მამუკა ლაბუჩიძე, გიორგი მულაძე, ავთანდილ სურმანიძე, თემურ ქურთციკიძე, ხვიჩა გოგია, გიორგი ქორქია, ლევან ჯიქია, გიორგი რურუა, ლაშა ივანაძე, სერგო მეგრელიშვილი და ვახო ფიცხელაური.

საქმის მასშტაბი და ბრალდებულები

საერთო ჯამში, 4 ოქტომბრის საქმესთან დაკავშირებით ბრალი 64 პირს აქვს წარდგენილი. სამართალდამცავები ამ დრომდე ეძებენ ორ მათგანს: ანტონ უპერსა და ირაკლი შაიშმელაშვილს. შაიშმელაშვილი სახელმწიფო უსაფრთხოების სამსახურის სპეციალური ოპერაციების დეპარტამენტის ყოფილი მაღალჩინოსანია.

ბრალდებულები ხუთ ჯგუფად იყვნენ დაყოფილი. პირველი ჯგუფის, ე.წ. „ორგანიზატორების“ საქმეზე განაჩენი 7 მაისს დადგა. პაატა ბურჭულაძეს, მურთაზ ზოდელავას, ირაკლი ნადირაძეს, ლაშა ბერიძესა და პაატა მანჯგალაძეს სასამართლომ 7-7 წლით პატიმრობა მიუსაჯა.

ამავე ჯგუფში მყოფი სხვა პირები — ირაკლი ჩხვირკია, თორნიკე მჭედლიშვილი, ნიკა გვერდწითელი და გური ჟვანია 5-წლიანი პატიმრობით დაისაჯნენ. ირაკლი შაიშმელაშვილს, რომელიც ამჟამად მიმალვაშია, დაუსწრებლად 2 წლით თავისუფლების აღკვეთა მიესაჯა.

4 ოქტომბრის მოვლენების ქრონიკა

2025 წლის 4 ოქტომბერს, მუნიციპალური არჩევნების პარალელურად, რუსთაველის გამზირზე ანტისამთავრობო აქცია გაიმართა. ოპოზიციის ლიდერები აქციას „მშვიდობიან რევოლუციას“ უწოდებდნენ და მას ხელისუფლების ცვლილების გადამწყვეტ ეტაპად განიხილავდნენ.

საღამოს, საარჩევნო უბნების დახურვის შემდეგ, აქციის ორგანიზატორებმა მომიტინგეებს პრეზიდენტის ადმინისტრაციის შენობისკენ გადაადგილებისკენ მოუწოდეს. ობელიანის მოედანზე მდებარე შენობას, რომელიც სტრატეგიულად მნიშვნელოვან ობიექტად ითვლება, მცირერიცხოვანი დაცვა იცავდა, რის გამოც მომიტინგეებმა ჭიშკრის გარღვევა და შენობის ტერიტორიაზე შეღწევა შეძლეს. მოგვიანებით, ადგილზე სამართალდამცავებისა და სპეცრაზმის დამატებითი ძალები მივიდნენ, რასაც აქციის მონაწილეთა და ორგანიზატორების მასობრივი დაკავებები მოჰყვა.