ალბანეთის დედაქალაქ ტირანაში ათასობით მოქალაქე შეიკრიბა. ეს არის ყველაზე მასშტაბური საპროტესტო აქცია აშშ-ის ყოფილი პრეზიდენტის, დონალდ ტრამპის სიძის, ჯარედ კუშნერის მიერ მხარდაჭერილი საკურორტო პროექტის წინააღმდეგ.

დემონსტრანტებმა პრემიერ-მინისტრ ედი რამას ოფისთან გადაინაცვლეს. მათ თან ჰქონდათ პლაკატები წარწერით „ალბანეთი გასაყიდი არ არის“ და სკანდირებდნენ „ახალი ალბანეთი“. საპროტესტო ტალღა ქალაქის ერთ-ერთ მთავარ გამზირზე ნახევარი მილის მანძილზე იყო გადაჭიმული.

დაახლოებით 5 მილიარდი ევროს (5.8 მილიარდი დოლარი) ღირებულების პროექტი ბალკანურ ქვეყანაში დიდ უკმაყოფილებას იწვევს. კრიტიკოსები აცხადებენ, რომ მშენებლობა დაცულ ჭაობიან ზონასთან ახლოს მიმდინარეობს, რომელიც ფლამინგოების, სელაპებისა და ზღვის კუების ბუდობის ადგილს წარმოადგენს.

„ეს არის იმის საუკეთესო მაგალითი, რაც ალბანეთში ბოლო 35 წელია ხდება“, — განაცხადა აქციის მონაწილემ ლეანდ ლაკრორიმ. დემონსტრანტების ნაწილი პროექტს „ფლამინგოების რევოლუციას“ უწოდებს, რაც მიუთითებს ეკოლოგიურ საფრთხეზე იმ ტერიტორიაზე, რომელიც გადამფრენი ფრინველებისთვის მნიშვნელოვან გაჩერებას წარმოადგენს.

პრემიერ-მინისტრი ედი რამა გარემოსდაცვითი რისკების შემცირებას ცდილობს. მისი თქმით, პროექტის ფარგლებში გარემოზე ზემოქმედების შეფასება დასრულდება და სამუშაოები პასუხისმგებლობით წარიმართება. რამას განცხადებით, ალბანეთი ველური ბუნების დაცვის საკითხს სერიოზულად უდგება.

თუმცა, ევროკავშირმა, რომელიც ალბანეთის გაწევრიანების პერსპექტივას განიხილავს, უკვე გააფრთხილა ოფიციალური ტირანა. ევროკავშირის სპიკერის, გიიომ მერსიეს თქმით, ევროპულ გარემოსდაცვით კანონმდებლობასთან შესაბამისობა გაწევრიანების ერთ-ერთი მთავარი პირობაა.

ეს პროტესტი პრემიერ-მინისტრ რამასთვის, რომელიც ქვეყანას 2013 წლიდან მართავს, კიდევ ერთი სერიოზული გამოცდაა. მოსახლეობის ნაწილი მას კორუფციასთან ბრძოლის არაეფექტურობასა და სოციალური სერვისების გაუარესებას საყვედურობს. მიუხედავად იმისა, რომ მთავრობამ კორუფციასთან საბრძოლველად სპეციალური პროკურატურა შექმნა, საზოგადოებრივი ნდობა კვლავ დაბალია.

საკურორტო პროექტის იდეა ჯარედ კუშნერსა და მის მეუღლეს, ივანკა ტრამპს ეკუთვნით. მათ ალბანეთი რამდენიმე წლის წინ, იახტით მოგზაურობისას გაიცნეს და შეიყვარეს. მიუხედავად მასობრივი პროტესტისა და ადგილობრივი მოსახლეობის წინააღმდეგობისა, პრემიერ-მინისტრი აცხადებს, რომ პროექტი გეგმის მიხედვით გაგრძელდება.