შეერთებული შტატების პრეზიდენტმა დონალდ ტრამპმა განაცხადა, რომ ოფიციალურმა ვაშინგტონმა ირანთან ომი დაასრულა. ტრამპის თქმით, მხარეებმა პრინციპულ შეთანხმებას მიაღწიეს, რომელიც რეგიონში დაძაბულობის განმუხტვას ისახავს მიზნად.

„არ ვიცი, გაიგეთ თუ არა, მაგრამ ჩვენ დღეს ირანთან ომი დავასრულეთ. ისინი დათანხმდნენ, რომ არასდროს ექნებათ ბირთვული იარაღი, რასაც ჩვენ დაჟინებით მოვითხოვდით. ეს იყო მთავარი მიზანი, რაც მოლაპარაკებების 95 პროცენტს შეადგენდა“, - განაცხადა პრეზიდენტმა.

3 ფოტო — დააჭირე გასადიდებლად

ტრამპის განცხადებით, დოკუმენტზე ხელმოწერა უახლოეს დღეებში იგეგმება. პრეზიდენტის თქმით, არ არის გამორიცხული, რომ ეს მნიშვნელოვანი პროცედურა ევროპაში განხორციელდეს.

თუმცა, სიტუაცია საკმაოდ წინააღმდეგობრივია. ირანის საგარეო საქმეთა სამინისტროს პრესსპიკერმა, ესმაილ ბაღეიმ, ოფიციალური პოზიცია დააფიქსირა და გავრცელებული ინფორმაცია მკაცრად გააკრიტიკა.

ბაღეის განცხადებით, ცნობები აშშ-სთან რაიმე სახის საბოლოო შეთანხმების შესახებ სპეკულაციურია. მისი თქმით, მხარეებს შორის ჯერჯერობით არაფერია საბოლოოდ შეთანხმებული, რაც ამერიკული მხარის ოპტიმიზმს მნიშვნელოვნად ამცირებს.