შინაგან საქმეთა სამინისტროს ახალმა დეპარტამენტმა, რომლის ფუნქციაც სოციალურ ქსელებში „სიძულვილის ენის“ მონიტორინგია, პირველი საქმე აღძრა. ადმინისტრაციული წარმოება მუსიკოს მაია დარსმელიძის წინააღმდეგ დაიწყო.

დარსმელიძემ, რომელიც საჯაროდ აკრიტიკებს მმართველ პარტიას, „ქართულ ოცნებას“, ინფორმაცია სოციალურ ქსელში გაავრცელა. მან აღნიშნა, რომ შესაბამისი შეტყობინება უწყებისგან უკვე მიიღო.

„ურა, მე გავჭერი ლენტი. დამიკავშირდა სქროლინგის დეპარტამენტი“, — დაწერა მუსიკოსმა ფეისბუკზე. მის განცხადებით, პოლიციაში საჩივარი ნინო ჯგარკავამ შეიტანა, რომელიც მმართველი პარტიის აქტიური მხარდამჭერია. საქმის საფუძველი მუსიკოსის ფეისბუკ-პოსტების სკრინშოტები გახდა, სადაც, ავტორის მტკიცებით, შეურაცხმყოფელი გამონათქვამები იყო.

საქმეზე სასამართლო სხდომა 10 ივლისისთვისაა ჩანიშნული. ეს პირველი შემთხვევაა, როდესაც 1 ივნისს ამოქმედებულმა ახალმა სტრუქტურამ საკუთარი უფლებამოსილება გამოიყენა.

რა არის „სქროლინგის დეპარტამენტი“?

შსს-ს სტრუქტურაში ახალი დანაყოფის შექმნის შესახებ განცხადება მამუკა მდინარაძემ გააკეთა. მისი თქმით, უწყება სისტემატურად გააკონტროლებს საჯარო განცხადებებს, რათა მათში სიძულვილის ენა, მტრობის გაღვივება ან ღირსების შემლახველი შინაარსი არ იყოს.

ინიციატივა ოპოზიციისა და უფლებადამცველების მწვავე კრიტიკის საგანი გახდა. ოპონენტები მიიჩნევენ, რომ ახალი სტრუქტურა ცენზურის მექანიზმად გადაიქცევა და სიტყვის თავისუფლებას შეზღუდავს. კრიტიკოსებმა უწყებას ირონიულად „სქროლინგისა და სკრინების დეპარტამენტი“ უწოდეს.

საკანონმდებლო ფონი

ბოლო თვეების განმავლობაში, მთავრობის რამდენიმე კრიტიკოსი უკვე დაჯარიმდა ან ადმინისტრაციული პატიმრობა შეეფარდა იმ განცხადებებისთვის, რომლებიც სასამართლომ საჯარო მოხელეების მიმართ „შეურაცხმყოფელად“ მიიჩნია.

3 ფოტო — დააჭირე გასადიდებლად

შეგახსენებთ, რომ თებერვალში პარლამენტმა კანონმდებლობაში ცვლილებები შეიტანა. ამ ცვლილებებით, სოციალურ ქსელებში გამოხატული შეურაცხყოფა ადმინისტრაციულ სამართალდარღვევად დაკვალიფიცირდა.