„ძლიერი საქართველო - ლელოს“ წევრი გრიგოლ გეგელია პრემიერ-მინისტრ ირაკლი კობახიძის სამთავრობო პროგრამების შესრულების შესახებ მოხსენებას კრიტიკულად აფასებს. ოპოზიციონერი დეპუტატი პრემიერის ანგარიშს „ტყუილების კონას“ უწოდებს და დოკუმენტში წარმოდგენილ არაერთ საკითხზე ამახვილებს ყურადღებას.

გეგელიას თქმით, კობახიძის განცხადება ევროკავშირთან ინსტიტუციური თანამშრომლობის შეჩერების შესახებ რეალობას არ შეესაბამება. მისი მტკიცებით, თავად პრემიერმა ჯერ კიდევ 2024 წლის ნოემბერში შეაჩერა ქვეყნის ევროპული ინტეგრაციის პროცესი, რის შემდეგაც ევროკავშირმა თანამშრომლობა შეამცირა.

კითხვები ანაკლიის პორტთან დაკავშირებით

ოპოზიციონერი დეპუტატი ანაკლიის ღრმაწყლოვანი პორტის მშენებლობის პროცესსაც აკრიტიკებს. გეგელიას განცხადებით, ხელისუფლება საზოგადოებას იმ დაპირებებს აძლევს, რომლებიც წლების წინ უკვე შესრულებული უნდა ყოფილიყო.

„6 წლის თავზე ვისმენთ, რომ მიმდინარეობს დაღრმავებითი სამუშაოები. ეს ის სამუშაოებია, რაც კონსორციუმმა წლების წინ უკვე განახორციელა“, — აცხადებს გეგელია. მისი თქმით, პორტამდე მისასვლელი ინფრასტრუქტურის არარსებობა დამატებითი დასტურია იმისა, რომ პროექტი ვერ ვითარდება.

ინვესტიციები და ეკონომიკური მაჩვენებლები

გრიგოლ გეგელიამ ყურადღება გაამახვილა პირდაპირ უცხოურ ინვესტიციებზეც. მისი თქმით, 2025 წლის მონაცემებით, 1.68 მილიარდიდან 1.4 მილიარდი რეინვესტიციაა, რაც ახალი ფულის შემოდინებაზე არ მიუთითებს.

3 ფოტო — დააჭირე გასადიდებლად

გარდა ამისა, მან ეჭვქვეშ დააყენა პრემიერის მიერ დასახელებული ევროკავშირის სამართალთან დაახლოების 80%-იანი მაჩვენებელი. გეგელიას მტკიცებით, ევროკავშირის ოფიციალური მონაცემებით, საგარეო პოლიტიკის თანხვედრის მაჩვენებელი გაცილებით დაბალია და 40%-ს შეადგენს.

სოციალური და უსაფრთხოების საკითხები

გეგელიამ კრიტიკა არ დააკლო სოციალურ პროგრამებსაც. მისი ინფორმაციით, ხელისუფლებამ მილიონობით ლარი „ფიქციური სამუშაო ადგილების“ შექმნაში გაფლანგა, ნაცვლად იმისა, რომ ეს თანხა სოციალურად დაუცველი ბავშვების დახმარებისთვის მოეხმარა.

„ასეთია კვერცხის ფასთან ბრძოლაში გმირულად დაცემული პრემიერის ტყუილების კონა“, — აღნიშნა გეგელიამ და დასძინა, რომ მთავრობამ საკუთარი ინტერესები ქვეყნის რეპუტაციასა და კეთილდღეობაზე მაღლა დააყენა.