ოპოზიციურ სპექტრში დაპირისპირება ახალ ფაზაში გადავიდა. ამჯერად კრიტიკის სამიზნე ოპოზიციური ალიანსის შიგნით არსებული უთანხმოებებია, რაც მიხეილ სააკაშვილის განცხადებებსაც მოჰყვა. ექსპრეზიდენტმა ოპონენტებს „ლუზერის“ ფსიქოლოგია დააბრალა, რამაც პოლიტიკურ წრეებში მორიგი ხმაური გამოიწვია.

ამ ფონზე, „ევროპული საქართველოს“ თავმჯდომარემ, გიგი წერეთელმა, მკაფიო პოზიცია დააფიქსირა. მისი თქმით, პარტია არ აპირებს არბიტრის ან მოსამართლის ფუნქციის შესრულებას და არც რომელიმე მხარეს ემხრობა.

„მე არ ვარ რეფერი და არც ჩვენი პარტია არ არის ახლა ვინმეს მოსამართლე, ან რომელიმე მხარის დამჭერი. ჩვენც გვაქვს ძალიან ბევრი ძველი ისტორია, მაგრამ ამას არც ვახვევთ თავს და არც ვარჩევთ ამას“, - აღნიშნა წერეთელმა.

წერეთელი ხაზს უსვამს, რომ ყველა პოლიტიკურ განცხადებას და ქმედებას თავისი პასუხისმგებლობა ახლავს. მისი თქმით, ოპოზიციური პროცესები არ უნდა გახდეს ვინმეს პირადი ამბიციების ან ეგოს მსხვერპლი.

„ნამდვილად არ მინდა, რომ ეს პროცესი რაღაცნაირად დაზარალდეს ვინმეს ამბიციით, ვინმეს ეგოთი და რაღაც თავისი ინტერესით“, - განაცხადა „ევროპული საქართველოს“ ლიდერმა. მან ასევე აღნიშნა, რომ პოლიტიკოსებმა უნდა გააცნობიერონ, რომ მათ უკან ამომრჩევლები და მოქალაქეები დგანან, რომელთა ინტერესებიც პრიორიტეტულია.

ამ დროისთვის ოპოზიციაში არსებული დაძაბულობა კვლავ რჩება საჯარო განხილვის საგნად. პოლიტიკური გაერთიანებების მხრიდან ურთიერთბრალდებები აჩენს კითხვებს იმის შესახებ, თუ რამდენად შეძლებენ ისინი საერთო პლატფორმის შენარჩუნებას.