საქართველოს საარჩევნო ადმინისტრაციის მაღალი რანგის დელეგაცია სომხეთში მიმდინარე საპარლამენტო არჩევნების პროცესებს აკვირდებოდა. ვიზიტი სომხეთის ცენტრალური საარჩევნო კომისიის ოფიციალური მოწვევით შედგა.

ქართულ დელეგაციას ცენტრალური საარჩევნო კომისიის (ცესკო) თავმჯდომარე გიორგი კალანდარიშვილი ხელმძღვანელობდა. ჯგუფის შემადგენლობაში შედიოდნენ ცესკოს მდივანი გიორგი ჯავახიშვილი, კომისიის წევრები გიორგი ძაგანია და არჩილ ანასაშვილი, ასევე საარჩევნო სისტემების განვითარების, რეფორმებისა და სწავლების ცენტრის დირექტორი ნათია ზაალიშვილი და ადმინისტრაციული სამსახურის უფროსი გიორგი ეზუგბაია.

სომხეთში ყოფნისას ქართველი დამკვირვებლები არჩევნების მთლიან ციკლს დააკვირდნენ. დელეგაციის წევრებმა უბნების გახსნის პროცედურები, კენჭისყრის მიმდინარეობა და არჩევნების დახურვის ეტაპები შეისწავლეს.

3 ფოტო — დააჭირე გასადიდებლად

ვიზიტის ფარგლებში გაიმართა შეხვედრები სომხეთის ცენტრალური საარჩევნო კომისიის ხელმძღვანელობასთან. მხარეებმა განიხილეს ის ტექნიკური და ადმინისტრაციული სამუშაოები, რომლებიც სომხურმა მხარემ საპარლამენტო არჩევნების ორგანიზებისთვის განახორციელა.

გიორგი კალანდარიშვილის თქმით, არჩევნებისთვის მზადების პროცესში მასშტაბური სამუშაოები ჩატარდა. გარდა სომხეთის ცესკოს წარმომადგენლებთან შეხვედრისა, ქართულმა დელეგაციამ კონსულტაციები გამართა სხვა ქვეყნების საარჩევნო ადმინისტრაციებთან და საერთაშორისო სადამკვირვებლო ორგანიზაციების წარმომადგენლებთან.

აღნიშნული შეხვედრები მიზნად ისახავდა გამოცდილების გაზიარებას და საარჩევნო ადმინისტრაციებს შორის სამომავლო თანამშრომლობის პერსპექტივების განხილვას. სომხეთში საპარლამენტო არჩევნები 2026 წლის 7 ივნისს გაიმართა.