გორში, პოლიციის შენობასთან საპროტესტო აქცია გაიმართა. მოქალაქეებმა „კომბინატის დასახლებაში“ მომხდარი ინციდენტი გააპროტესტეს, სადაც პოლიციელები მოქალაქე პაპუნა ლოცულაშვილს ფიზიკურად გაუსწორდნენ. ადგილზე გორელებთან ერთად თბილისიდან ჩასული აქტივისტები და 2024 წლის აქციების დროს დაკავებულთა ოჯახის წევრებიც მივიდნენ.

აქციის მონაწილეებმა პოლიციის შენობასთან ბანერები მიიტანეს წარწერებით: „არა წამებას“, „ხმა ამოიღე ღირსეულო პოლიციელო“ და „ვისი იმედი ჰქონდეს მოქალაქეს?“. დაძაბულობა მას შემდეგ შეიქმნა, რაც ერთ-ერთმა აქტივისტმა, რუსკა მჭედლიძემ, პოლიციის შენობაში შესვლა სცადა, თუმცა სამართალდამცავებმა მას ამის უფლება არ მისცეს.

სისტემური ძალადობა თუ გადაცდომა?

აქციის მონაწილეები მომხდარს „სისტემურ დანაშაულს“ უწოდებენ. მათი თქმით, კადრებში ნათლად ჩანს, როგორ უსწორდება რამდენიმე პოლიციელი ერთ ადამიანს, რაც მათი შეფასებით, ჩვეულებრივ გადაცდომას სცდება. „ეს რომ ერთი და ორი ყოფილიყო, შეიძლება კიდევ გადაცდომა გვეწოდებინა“, - განაცხადა აქციის ერთ-ერთმა მონაწილემ.

შეგახსენებთ, რომ 27 მაისს მედიასაშუალება qartli.ge-მ გაავრცელა კადრები, სადაც ასახულია, როგორ ძალადობენ სამართალდამცავები პაპუნა ლოცულაშვილზე. აღსანიშნავია, რომ თავდაპირველად პოლიცია სწორედ ლოცულაშვილს ედავებოდა სამართალდამცავზე თავდასხმას, რისთვისაც მას 2-დან 6 წლამდე პატიმრობა ემუქრებოდა.

ოფიციალური პოზიცია და შედეგები

შინაგან საქმეთა მინისტრის მოადგილე ალექსანდრე დარახველიძემ განაცხადა, რომ ინციდენტს წინ უსწრებდა მოქალაქის აგრესიული ქმედება და პოლიციელზე „ბლაგვი საგნით“ თავდასხმა. თუმცა, პროკურატურამ, საქმის შესწავლის შემდეგ, ექვსი პოლიციელი დააკავა.

მათ ბრალი სისხლის სამართლის კოდექსის 333-ე მუხლის მესამე ნაწილის „ბ“ ქვეპუნქტით წაუყენეს, რაც სამსახურებრივი უფლებამოსილების ძალადობით გადამეტებას გულისხმობს. თავად პაპუნა ლოცულაშვილი, რომელსაც სამედიცინო შემოწმების შედეგად ნეკნი აქვს გატეხილი, საქმის მასალების გასაჯაროების შემდეგ პროკურორის დადგენილებით გათავისუფლდა, თუმცა მის წინააღმდეგ სისხლის სამართლის საქმის წარმოება კვლავ გრძელდება.