სახელმწიფო უსაფრთხოების სამსახურმა (სუს) დაადასტურა, რომ ჯაშუშობის ბრალდებით დაკავებული პირი „ევრაზიის ინსტიტუტის“ დირექტორი გულბაათ რცხილაძეა. გამოძიების ვერსიით, ბრალდებული წლების განმავლობაში სისტემატურად თანამშრომლობდა უცხო ქვეყნების სპეცსამსახურებთან.

სუს-ის უფროსის მოადგილის, ლაშა მაღრაძის განცხადებით, რცხილაძე სადაზვერვო ხასიათის ინფორმაციას მატერიალური სარგებლის მიღების მიზნით გადასცემდა. უწყება არ ასახელებს იმ ორ კონკრეტულ ქვეყანას, რომელთა ინტერესებსაც ბრალდებული ატარებდა.

კონსპირაცია და დაფინანსება

გამოძიების ცნობით, რცხილაძეს უცხო ქვეყნების წარმომადგენლებთან „მაღალ დონეზე ორგანიზებული კონსპირაციული ხასიათის“ კონტაქტი ჰქონდა. ინფორმაციის გადაცემა ხდებოდა როგორც პირისპირ შეხვედრების, ისე ელექტრონული საშუალებების გამოყენებით. შეხვედრები ხშირად ქვეყნის ფარგლებს გარეთ იმართებოდა.

ცნობილია, რომ დაკავებულმა შექმნა საინფორმაციო პლატფორმები და აორგანიზებდა სხვადასხვა ღონისძიებებს. „აი, ფაქტის“ ინფორმაციით, რცხილაძის ორგანიზაციას 2020 წლიდან აფინანსებდა რუსული „პრავფონდი“, რომელიც აშშ-ის სანქციების ქვეშ 2023 წელს მოექცა.

პრორუსული აქტივობები

„ევრაზიის ინსტიტუტი“ წლების განმავლობაში ღიად ატარებდა კონფერენციებს, სადაც რუსეთ-საქართველოს ურთიერთობები განიხილებოდა. ერთ-ერთი ასეთი ღონისძიება 2024 წელს გაიმართა სათაურით: „საქართველოს დაბრუნება რუსეთის იმპერიაში - ისტორიული სიმართლე კონიუნქტურული სიცრუის წინააღმდეგ“.

აღსანიშნავია, რომ ეს მაისში ჯაშუშობის ბრალდებით დაკავების უკვე მეორე შემთხვევაა. 6 მაისს პროკურატურამ ბრალი წარუდგინა ფინანსური პოლიციის მაღალჩინოსანს, გიორგი უძილაურს, რომელიც წარსულში „ქართუ ჯგუფის“ საზოგადოებასთან ურთიერთობის სამსახურს ხელმძღვანელობდა.

საქართველოს სისხლის სამართლის კოდექსის 314-ე მუხლის პირველი ნაწილით გათვალისწინებული დანაშაული 8-დან 12 წლამდე პატიმრობას ითვალისწინებს. გამოძიება გრძელდება.