საპარლამენტო უმრავლესობის ლიდერი ირაკლი კირცხალია გიორგი კანდელაკის მიერ გავრცელებულ კვლევას ეხმიანება, სადაც ნათქვამია, რომ თბილისი ირანის სპეცსამსახურების მიერ აგენტების გადაბირებისა და ტერორისტული ოპერაციების განხორციელებისთვის ნაყოფიერ ნიადაგად იქცა.

კირცხალიას განცხადებით, მსგავსი შინაარსის მასალები მიზნად ისახავს ქვეყნის ინტერესების დაზიანებას. მან კანდელაკის საქმიანობა „თანამედროვე ორჯონიკიძეების“ ქმედებებს შეადარა.

„კანდელაკის მოღალატეობრივი მოღვაწეობა“

„მიზანი ძალიან მარტივია. ეს არის ქვეყნის გარედან ჩვენი სახელმწიფო ინტერესების დაზიანება. კანდელაკის ისტორია ხელის გულზე დევს. ჩვენი გუნდის წევრებს ახსოვთ, როგორ დარბოდა ის კაბინეტებში, როდესაც საქართველო უვიზო რეჟიმის მიღებას ელოდა, რათა ევროპელი პოლიტიკოსებისთვის ხელი შეეშალა და ქვეყნისთვის ეს ბენეფიტი არ მიეცათ“, - განაცხადა კირცხალიამ „იმედის“ ეთერში.

მისი თქმით, კანდელაკი პოლიტიკურ წრეებში სწორედ ამგვარი აქტივობების გამო „დაიტოვეს კონტრაქტზე“. კირცხალიას მტკიცებით, ოპოზიციის წარმომადგენლის სახელი ყველა იმ კვლევასა და განცხადებაში ფიგურირებს, რომელიც, მისივე შეფასებით, აბსურდულია.

გრანტები და „ტურისტული ბილიკები“

საპარლამენტო უმრავლესობის ლიდერმა კანდელაკის არასამთავრობო საქმიანობაზეც ისაუბრა. კირცხალიას თქმით, საფრანგეთის საელჩომ კანდელაკის ორგანიზაციას გრანტი ტურისტული ბილიკების დაკვალვისთვის გამოუყო.

„ალბათ, ამ დაკვალვის დროს თავში მოსდის ხოლმე განსაკუთრებით ბინძური და სრულიად აბსურდული ცილისწამება საკუთარი ქვეყნის წინააღმდეგ“, - აღნიშნა ირაკლი კირცხალიამ.

კირცხალიამ კანდელაკთან ერთად სხვა ოპოზიციონერებიც ახსენა, მათ შორის თინა ხიდაშელი და ნატალია საბანაძე. მისი თქმით, მსგავსი პოლიტიკური აქტორების ქმედებები მიმართულია სახელმწიფოს რეპუტაციის შელახვისკენ.