დღეს, თბილისის დროით 21:00 საათზე, „დინამო არენაზე“ მსოფლიო მუსიკის ერთ-ერთი ყველაზე გავლენიანი ფიგურა, კანიე უესტი კონცერტს გამართავს. სტადიონის კარი მსმენელისთვის 16:00 საათზე გაიხსნება.

მნიშვნელოვანი რეკომენდაციები მსმენელისთვის

„სთარინგ ჯორჯიას“ კრეატიული ხელმძღვანელი, ციცი იაშვილი მოსახლეობას მოუწოდებს, ბილეთები მხოლოდ ოფიციალურ პლატფორმა tkt.ge-ზე შეიძინონ. ორგანიზატორები ხაზგასმით აღნიშნავენ, რომ მესამე პირისგან შეძენილი ბილეთების ვალიდურობაზე პასუხისმგებლობას არ იღებენ. ბოლო პერიოდში უკვე დაფიქსირდა ყალბი ბილეთების გავრცელების შემთხვევები, მათ შორის კონცერტის შემდგომი წვეულებების სახელით.

უსაფრთხოების წესები სტადიონზე

კონცერტის ორგანიზატორებმა სტადიონზე შესვლის მსურველებისთვის მკაცრი შეზღუდვები დააწესეს. უსაფრთხოების მიზნით, აკრძალულია შემდეგი ნივთების შეტანა:

  • ნებისმიერი ტიპის ფოტოაპარატი;
  • ქოლგები (წვიმის შემთხვევაში რეკომენდებულია საწვიმარის გამოყენება);
  • სხვადასხვა სახის სახიფათო საგნები.

ორგანიზატორები მაყურებელს ურჩევენ, თან იქონიონ ყურის საცობები, რადგან ღონისძიება გამოირჩევა მაღალი დეციბელით და ინტენსიური ხმოვანი წნევით.

ტრანსპორტი და გადაადგილება

ღონისძიების გამო, „დინამო არენას“ მიმდებარე ტერიტორიაზე საგზაო მოძრაობა ღამის 02:00 საათამდე შეიზღუდა. მსმენელთა კომფორტული გადაადგილებისთვის, საზოგადოებრივი ტრანსპორტის მუშაობა გახანგრძლივდა:

  • მეტროპოლიტენი მუშაობას ორი საათით გვიან დაასრულებს;
  • ათზე მეტი ავტობუსის მარშრუტი ასევე დამატებითი რეისებით იმოძრავებს.

კანიე უესტი, რომელსაც ანგარიშზე 24 „გრემი“ და 150 მილიონზე მეტი გაყიდული ალბომი აქვს, ქართველი მსმენელის წინაშე მასშტაბური შოუთი წარდგება. ორგანიზატორები მაყურებელს მოუწოდებენ, დაწესებული რეკომენდაციები ზედმიწევნით დაიცვან.