საქართველოს პრემიერ-მინისტრმა ირაკლი კობახიძემ პარლამენტში გამოსვლისას „გახარია საქართველოსთვის“ წარმომადგენელს, გიორგი შარაშიძეს მიმართა და ქვეყანაში „დემოკრატიული უკუსვლის“ შესახებ გავრცელებული ნარატივის წარმოშობაზე ისაუბრა.

კობახიძის თქმით, ტერმინი „დემოკრატიული უკუსვლა“ საქართველოს წინააღმდეგ მიზანმიმართულად 2019 წლის ბოლოდან დაიწყეს. პრემიერი ხაზს უსვამს, რომ ეს პერიოდი ემთხვევა გიორგი გახარიას პრემიერ-მინისტრობას, რომელიც ამჟამად ოპოზიციური პარტიის თავმჯდომარეა.

„უსამართლო ბრალდებები და სუვერენული გადაწყვეტილებები“

პრემიერ-მინისტრმა აღნიშნა, რომ ამერიკისა და ევროპის მხრიდან საქართველოზე ზეწოლა მაშინაც არსებობდა. მისი განცხადებით, მუდმივად ისმოდა ერთიანი გზავნილები იმის შესახებ, რომ ქვეყანამ ევროატლანტიკური ინტეგრაციის კურსი შეცვალა.

„როდესაც თქვენი პარტიის თავმჯდომარე იყო პრემიერი, მაშინაც იგივე ტყუილებს ამბობდნენ, რასაც დღეს ამბობენ. მაშინ თუ ეს ადამიანები უსამართლოები იყვნენ, რატომ არ რეაგირებდა მთავრობა? პრემიერად დარჩენა მაშინ, როცა უკუსვლაზე საუბრობდნენ, უთავმოყვარეო საქციელი იყო“, - განაცხადა კობახიძემ.

პროპორციული სისტემა და მოლაპარაკებების ფორმატი

ირაკლი კობახიძემ გაიხსენა 2020 წლის საპარლამენტო არჩევნების შემდგომი პერიოდი და ოპოზიციასთან გამართული მოლაპარაკებები. მან აღნიშნა, რომ მოლაპარაკების პროცესი რეალურად არა ოპოზიციურ პარტიებთან, არამედ აშშ-ისა და ევროკავშირის ელჩებთან - კელი დეგნანთან და კარლ ჰარცელთან მიმდინარეობდა.

„ოპოზიციის წარმომადგენლები იქ ანტურაჟივით ისხდნენ. ეს არის ოპოზიციის რეალური სახე“, - განაცხადა პრემიერმა.

მთავრობის მეთაურმა ასევე უპასუხა პროპორციულ სისტემასთან დაკავშირებულ კრიტიკას. მისი თქმით, საარჩევნო სისტემის ფორმა ქვეყნის სუვერენული გადაწყვეტილებაა და დასავლელი პარტნიორების მხრიდან ამ საკითხის პოლიტიკურ ინსტრუმენტად გამოყენება უსამართლო იყო.

მოწოდება ერთიანობისკენ

სიტყვით გამოსვლის ბოლოს პრემიერმა ოპოზიციას მოუწოდა, რომ ევროინტეგრაციის საკითხზე სახელმწიფოს ინტერესები პარტიულ დღის წესრიგზე მაღლა დააყენონ.

„თუ თქვენი ოცნება ევროკავშირია, როგორც ამას კონსტიტუციაში ვწერთ, იქნებ სახელმწიფოს გვერდით დადგეთ. თუ რამე არ მოგწონთ - კანონი თუ გადაწყვეტილება - გაგვაკრიტიკეთ, მაგრამ ნუ ეწინააღმდეგებით ქვეყნის ინტერესებს“, - დაასკვნა ირაკლი კობახიძემ.