ვიცე-პრემიერმა და სამართალდამცავი ორგანოების კოორდინაციის საკითხებში სახელმწიფო მინისტრმა, მამუკა მდინარაძემ ტელეკომპანია „იმედის“ ეთერში პოლიციელების მხრიდან ძალადობის ამსახველ კადრებზე ისაუბრა. მისი თქმით, საზოგადოებაში გავრცელებული ინფორმაცია, თითქოს ხელისუფლება დანაშაულს მალავდა, სიმართლეს არ შეესაბამება.

მდინარაძის განმარტებით, 2022 წელს მომხდარი დანაშაულის შესახებ სამართალდამცავ ორგანოებს ინფორმაცია არ ჰქონდათ. იმ პერიოდში არც დაზარალებულებს მიუმართავთ შესაბამისი უწყებებისთვის და არც შეტყობინება დაფიქსირებულა. შედეგად, ფაქტი ოთხი წლის განმავლობაში მიჩქმალული დარჩა.

მყისიერი რეაგირება

„2022 წელს, როცა ეს დანაშაული მოხდა, შეტყობინება არსად იყო დაფიქსირებული. რეაგირება, ბუნებრივია, ვერ იქნებოდა, რადგან არავისთვის ეს ცნობილი არ იყო“, — განაცხადა მამუკა მდინარაძემ.

მინისტრის თქმით, ინფორმაცია გენერალურმა ინსპექციამ და სახელმწიფო უსაფრთხოების სამსახურმა მიმდინარე წლის 19-20 თებერვალს მიიღეს. ამის შემდეგ, სამართალდამცავმა სისტემამ ოთხი დღის ვადაში შეძლო საქმის ბოლომდე გამოძიება და დამნაშავე პოლიციელების დაკავება, რაც 23 თებერვალს განხორციელდა.

„ჩვენს მიერ გახსნილ საქმეს ატრიალებენ, რომ ჩვენ რაღაც დანაშაული ჩავიდინეთ“, — აღნიშნა ვიცე-პრემიერმა.

კრიტიკა მედიის მიმართ

მამუკა მდინარაძემ ყურადღება გაამახვილა იმ ფაქტზეც, რომ კადრები, რომლებიც ახლა გავრცელდა, შესაბამის მედიასაშუალებებს მანამდეც ჰქონდათ. მისი თქმით, მედიის მხრიდან ამ მასალების დროში გაწელვა პიარულ მიზნებს ემსახურება.

„წლების განმავლობაში ბევრჯერ ვნახეთ, რომ მათ წმინდა პიარული მიზნები აქვთ და არანაირი ემპათია ვიღაცის მიმართ არ ამოძრავებთ. რომ არ გაგვეხსნა ეს საქმე, ვერც ამ კადრებს ნახავდა ვერავინ“, — განაცხადა მდინარაძემ.

ვიცე-პრემიერის განმარტებით, სამართალდამცავმა სისტემამ თავად გაავრცელა ინფორმაცია დაკავებების შესახებ ჯერ კიდევ თებერვალში, რაც იმას ნიშნავს, რომ საქმე საჯარო და გახსნილი იყო.