ირანის უზენაესმა ლიდერმა, მოჯთაბა ხამენეიმ, ჰაჯის მომლოცველობის დაწყებასთან დაკავშირებით საჯარო მიმართვა გაავრცელა. სახელმწიფო მედიის ცნობით, მან ისრაელი „კიბოს სიმსივნედ“ მოიხსენია და განაცხადა, რომ ქვეყანა არსებობის „ბოლო ეტაპზეა“.

ხამენეიმ მოუწოდა მუსლიმებს, განსაკუთრებით კი ახალგაზრდებს, აქტიურად გაიმეორონ ლოზუნგები: „სიკვდილი ისრაელს“ და „სიკვდილი ამერიკას“. მისი მტკიცებით, მომავალი „ისლამურ ცივილიზაციას“ ეკუთვნის, რომელიც მტკიცედ უნდა გაემიჯნოს დასავლურ გავლენებს.

მიმართვაში ხაზგასმულია, რომ ახლო აღმოსავლეთის სახელმწიფოები აღარ უნდა იყვნენ „ამერიკული სამხედრო ბაზების ფარი“. ეს განცხადება იმეორებს მისი მამის, ალი ხამენეის რიტორიკას, რომელიც 28 თებერვალს, ირანზე საჰაერო დარტყმების შედეგად დაიღუპა.

აღსანიშნავია, რომ მოჯთაბა ხამენეი საჯაროდ თებერვლის მოვლენების შემდეგ აღარ გამოჩენილა. ვრცელდებოდა ინფორმაცია, რომ ის მძიმედ დაიჭრა, თუმცა ამის მიუხედავად, ის ირანის უზენაეს ლიდერად აირჩიეს.

მწვავე განცხადებები კეთდება აშშ-სა და ირანს შორის მიმდინარე სამშვიდობო მოლაპარაკებების პარალელურად. მიუხედავად შაბათ-კვირას დაფიქსირებული პროგრესისა, აშშ-ის სახელმწიფო მდივანი მარკო რუბიო აცხადებს, რომ შეთანხმების მიღწევა ჯერ კიდევ კითხვის ნიშნის ქვეშაა.

ვითარება რეგიონში კვლავ დაძაბულია. აშშ-ის სამხედროებმა სამხრეთ ირანში დარტყმები განახორციელეს, ირანული მხარე კი ამერიკული დრონის MQ-9 ჩამოგდებასა და F-35-ის წინააღმდეგ ცეცხლის გახსნაზე საუბრობს.