შინაგან საქმეთა სამინისტრომ თბილისში, მტკვრის მარცხენა სანაპიროზე მომხდარი ფატალური ავტოსაგზაო შემთხვევის ფაქტზე გამოძიება დაიწყო. უწყების ინფორმაციით, სამართალდამცველებმა უკვე დააკავეს პირი, რომელიც, წინასწარი მონაცემებით, ავარიის გამომწვევი მიზეზი გახდა.

შემთხვევა 2 ივნისს, საღამოს საათებში მოხდა. თვითმხილველების განცხადებით, მაღალი სიჩქარით მოძრავი Mercedes-ის მარკის ავტომობილი სხვა სატრანსპორტო საშუალებებს შეეჯახა. შეჯახების შედეგად, Volkswagen Jetta-ს მძღოლმა საჭეზე კონტროლი დაკარგა, რის გამოც მანქანა გზის დამცავ ჯებირს შეეჯახა და მტკვარში გადავარდა.

შსს-ს ცნობით, დაკავებულმა მძღოლმა საავარიო სიტუაცია შექმნა, რამაც ტრაგიკულ შედეგამდე მიიყვანა. გამოძიება საქართველოს სისხლის სამართლის კოდექსის 276-ე მუხლით მიმდინარეობს, რაც საგზაო მოძრაობის უსაფრთხოების წესების დარღვევას გულისხმობს.

მედიაში გავრცელებული ინფორმაციით, მდინარეში გადავარდნილი ავტომობილის მძღოლი 36 წლის რაჟდენ ჭინჭარაძეა. ის წარმოშობით ჭიათურის მუნიციპალიტეტის სოფელ ითხვისიდანაა და თბილისში ოჯახის სარჩენად მუშაობდა.

შემთხვევის ადგილზე სამაშველო ოპერაცია უწყვეტ რეჟიმში მიმდინარეობს. სამძებრო სამუშაოებში ჩართულები არიან მყვინთავები, სპეციალური კატერები და საგანგებო სიტუაციების მართვის სამსახურის ჯგუფები. მდინარის კალაპოტის დათვალიერებისა და სამძებრო სამუშაოების გასამარტივებლად, სპეციალისტებმა მტკვარში წყლის დონე ხელოვნურად დაწიეს.

3 ფოტო — დააჭირე გასადიდებლად

მიუხედავად იმისა, რომ სამძებრო ღონისძიებები უკვე მეორე დღეა აქტიურად მიმდინარეობს, დაკარგული მძღოლისა და ავტომობილის პოვნა ამ დრომდე ვერ მოხერხდა. სამაშველო ჯგუფები მუშაობას განაგრძობენ.