პარტია „ახალის“ ლიდერი ნიკა მელია ციხიდან გავრცელებულ წერილში მიხეილ სააკაშვილის მიერ ნახსენებ „მოღალატის“ თემას ეხმიანება. მელია ექსპრეზიდენტს მოუწოდებს, საჯაროდ დაასახელოს ის პირი, რომელიც 2022 წლის განმავლობაში, მათ შორის „ვივა მედში“ ყოფნის პერიოდში, სააკაშვილისა და ხელისუფლების „შუამავალი“ იყო.

გარიგება და „გადაგდება“

მელიას მტკიცებით, სააკაშვილმა აღნიშნული პირის მეშვეობით ხელისუფლებასთან გარიგება დადო, თუმცა საბოლოოდ, 2022 წლის ბოლოს, პირობები დაირღვა. ყოფილი თანაგუნდელი ამტკიცებს, რომ სააკაშვილის მიერ გავრცელებული ბრალდებები ღალატზე მხოლოდ იმ ისტორიის გადაფარვას ემსახურება, რომელიც მას უცხოეთში გამგზავრების სანაცვლოდ ხელისუფლებასთან ჰქონდა.

„სააკაშვილს უყვარს ღალატი, მაგრამ სძულს მოღალატე, რომელსაც არ ასახელებს“, — წერს მელია და დასძენს, რომ საზოგადოება დეტალებს მაინც შეიტყობს.

რატომ ჩამოვიდა სააკაშვილი?

წერილში მელია 2021 წელს სააკაშვილის საქართველოში ჩამოსვლის მიზეზებსაც ეხება. მისი თქმით, ექსპრეზიდენტი „დაუძლეველმა ეჭვიანობამ“ და იმ შიშმა აიძულა, რომ მელია მას პარტიას წაართმევდა. მელია იხსენებს 2021 წლის მაის-ივნისის სოციოლოგიურ კვლევებს, რომლის მიხედვითაც, „ნაციონალური მოძრაობის“ მხარდამჭერთა დიდ ნაწილს სააკაშვილის ფაქტორი გადამწყვეტად არ მიაჩნდა.

სააკაშვილის პოზიცია

თავის მხრივ, მიხეილ სააკაშვილი უარყოფს ნიკა მელიასთან რაიმე კავშირს ამ პროცესებში. 27 მაისს გამოქვეყნებულ პოსტში მან აღნიშნა, რომ პირი, რომელმაც ის საქართველოში ჩამოიყვანა, ფართო საზოგადოებისთვის უცნობია და არცერთი მოქმედი აქტიური პოლიტიკოსი არ არის.

უფრო ადრე, სასამართლო სხდომაზე, სააკაშვილმა განაცხადა, რომ მის გარემოცვაში „რუსეთის აგენტურა“ იყო ჩანერგილი, რომელმაც მისი მონაცემები ხელისუფლებას გადასცა. თუმცა, მან ამ პირის ვინაობის დასახელებაზე უარი თქვა და განაცხადა, რომ „ამას მნიშვნელობა არ აქვს“.