საქართველოს საავიაციო ბაზარს გლობალური ავიაკომპანია Qatar Airways შეემატა. ავიაკომპანიამ თბილისის მიმართულებით პირველი რეგულარული სატვირთო რეისი განახორციელა, რაც ქვეყნის საჰაერო ლოჯისტიკის სექტორისთვის მნიშვნელოვანი ნაბიჯია.

საქართველოს ეკონომიკისა და მდგრადი განვითარების სამინისტროს ინფორმაციით, ფრენები სამოქალაქო ავიაციის სააგენტოს მიერ გაცემული ნებართვის საფუძველზე განხორციელდება. საჰაერო ხომალდები Boeing 777-ის ტიპის თვითმფრინავებით იფრენენ.

ავიაკომპანია რეისებს კვირაში ერთხელ, წრიული მარშრუტით — „დოჰა-ერევანი-თბილისი-დოჰა“ შეასრულებს. ეს მარშრუტი რეგიონულ სატრანსპორტო კვანძად თბილისის პოზიციონირებას კიდევ უფრო აძლიერებს.

რეკორდული მაჩვენებლები სექტორში

Qatar Airways-ის შემოსვლა ქართულ ბაზარზე საჰაერო ტვირთების სექტორში დაფიქსირებული ისტორიული მაქსიმუმის ფონზე ხდება. ეკონომიკის სამინისტროს მონაცემებით, 2025 წელს საქართველოში საჰაერო გზით გადაზიდული ტვირთების მოცულობამ 38 578 ტონა შეადგინა.

ეს მაჩვენებელი აბსოლუტური ისტორიული რეკორდია საქართველოს აეროპორტებისთვის. სტატისტიკა ადასტურებს, რომ სექტორი სწრაფი ტემპით იზრდება: 2025 წელს სატვირთო ბრუნვა 2024 წელთან შედარებით 50%-ით, ხოლო 2023 წელთან მიმართებაში 101%-ით გაიზარდა.

3 ფოტო — დააჭირე გასადიდებლად

სპეციალისტების აზრით, ასეთი მსხვილი ავიაგადამზიდველის ოპერირების დაწყება კიდევ უფრო გაზრდის კონკურენციას ბაზარზე და ხელს შეუწყობს საექსპორტო-იმპორტული ოპერაციების გამარტივებას.