„რკინიგზის საქმე“: 8 პირი პატიმრობაში, მათ შორის 2 – დაუსწრებლად

სასამართლომ „რკინიგზის საქმეზე“ დაკავებულ რვა პირს აღკვეთის ღონისძიების სახით პატიმრობა შეუფარდა. ბრალდებულთა შორის არიან „საქართველოს რკინიგზის“ ყოფილი დირექტორი და კერძო კომპანიების ხელმძღვანელები. ორ მათგანს, დავით ფერაძესა და ზაზა ბიძინაშვილს, პატიმრობა დაუსწრებლად შეეფარდათ, რის გამოც მათზე საერთაშორისო ძებნა გამოცხადდება.

საქმის ფიგურანტები არიან:

• დავით ფერაძე – „საქართველოს რკინიგზის“ ყოფილი დირექტორი
• გიორგი მარუქაშვილი – რკინიგზის ინფრასტრუქტურის ყოფილი დირექტორი
• მალხაზ ომარაშვილი – შპს „კახეთის“ დამფუძნებელი
• გიორგი კურტანიძე – შპს „ნოვა ტრანსის“ დამფუძნებელი
• ალექსანდრე ტორიაშვილი – შპს „ჯადექსას“ დამფუძნებელი
• ზაზა ბიძინაშვილი – სამშენებლო კომპანია „ხუროს“ წარმომადგენელი
• ანზორ ჯამალაშვილი – შპს „გრანდ კახეთის“ ხელმძღვანელი
• რევაზ რევაზიშვილი – შპს „რაველდის“ დირექტორი

პროკურატურის ინფორმაციით, ბრალდებულები კორუფციული სქემის საშუალებით დიდი ოდენობით უკანონო შემოსავალს იღებდნენ. გამოძიება მათ ედავება სამსახურებრივი მდგომარეობის ბოროტად გამოყენებას, ჯგუფურად ჩადენილ თაღლითობას, ყალბი დოკუმენტების დამზადება-გამოყენებას და უკანონო შემოსავლის ლეგალიზაციას.

სასამართლო პროცესზე დაცვის მხარემ აღნიშნულ გადაწყვეტილებას მხარი არ დაუჭირა. ადვოკატები ითხოვდნენ ბრალდებულების აღკვეთის ღონისძიების გარეშე დატოვებას ან, ალტერნატივის სახით, გირაოს გამოყენებას. თავად ბრალდებულები წარდგენილ ბრალდებებს არ აღიარებენ.

საქმეში ფიგურანტი კომპანიების საქმიანობა და მათი კავშირი რკინიგზის ყოფილ ხელმძღვანელობასთან სუს-ის მიერ დაწყებული სისხლისსამართლებრივი დევნის მთავარი საკითხია. გამოძიება გრძელდება და ძალოვანი უწყებები დეტალებს ეტაპობრივად აზუსტებენ.