რუმინეთის საგარეო საქმეთა სამინისტრომ 29 მაისს ოფიციალურად დაადასტურა, რომ ქვეყნის სასაზღვრო ქალაქ გალატში რუსული დრონი ჩამოვარდა. ინციდენტი მრავალბინიან საცხოვრებელ კორპუსს შეეხო, რასაც შენობის სახურავზე ხანძარი და ნგრევა მოჰყვა.

ოფიციალური ინფორმაციით, თავდასხმის შედეგად ორი ადამიანი მსუბუქად დაშავდა. ადგილზე მობილიზებულმა სამსახურებმა შენობის მცხოვრებთა ევაკუაცია განახორციელეს, რათა საფრთხე თავიდან აეცილებინათ.

მკაცრი შეფასება ბუქარესტისგან

რუმინეთის საგარეო უწყება მომხდარს რუსეთის ფედერაციის მხრიდან „სერიოზულ და უპასუხისმგებლო ესკალაციას“ უწოდებს. განცხადებაში ხაზგასმულია, რომ აღნიშნული დრონი, რომელიც თავდაპირველად უკრაინული ინფრასტრუქტურის წინააღმდეგ იყო მიმართული, ნატო-ს წევრი ქვეყნის საჰაერო სივრცეში აღმოჩნდა.

„რუსეთის ფედერაცია კვლავ აგრესორ სახელმწიფოდ რჩება, რომელიც უკანონო ომს აწარმოებს. ეს ქმედება პირდაპირ საფრთხეს უქმნის რეგიონულ უსაფრთხოებას და მშვიდობიანი მოქალაქეების სიცოცხლეს“, - ნათქვამია სამინისტროს განცხადებაში.

ბუქარესტი აცხადებს, რომ მომხდარის საპასუხოდ აუცილებელ დიპლომატიურ ზომებს მიიღებს. ქვეყნის ხელისუფლება უკვე დაუკავშირდა ნატო-ს გენერალურ მდივანს და მოკავშირეებს ინციდენტის დეტალების შესახებ ინფორმაცია მიაწოდა.

მოთხოვნა დამატებითი დაცვის შესახებ

რუმინეთი აცხადებს, რომ აძლიერებს საერთაშორისო ზეწოლას რუსეთზე, რათა საომარი მოქმედებები დაუყოვნებლივ შეწყდეს. ამავდროულად, ოფიციალური ბუქარესტი მოკავშირეებს მიმართავს თხოვნით, დააჩქარონ დრონებთან ბრძოლის თანამედროვე სისტემებისა და საშუალებების გადაცემა.

ქვეყნის საგარეო უწყების განმარტებით, რუმინეთი „მაქსიმალური სიმტკიცით“ იმოქმედებს, რათა დაიცვას თავისი საჰაერო სივრცე და მოქალაქეების უსაფრთხოება. რუსეთი, როგორც აგრესორი სახელმწიფო, სრულ პასუხისმგებლობას იღებს იმ მძიმე შედეგებზე, რაც რეგიონში მიმდინარე ომს მოჰყვება.