რუსეთის საოკუპაციო ძალები უკრაინაში დაკავებულ ტერიტორიებზე კონტროლს უკვე მეორე თვეა კარგავენ. ამერიკის ომის შემსწავლელი ინსტიტუტის (ISW) უახლესი ანალიზის მიხედვით, 2026 წლის გაზაფხულზე დაგეგმილი რუსული შეტევა უკრაინულმა თავდაცვამ მნიშვნელოვნად შეაჩერა.

სტატისტიკა შთამბეჭდავია: თუ აპრილში რუსეთის არმიამ 116 კვადრატული კილომეტრი დაკარგა, მაისის ბოლოსთვის ეს მაჩვენებელი 281.1 კვადრატულ კილომეტრამდე გაიზარდა. ანალიტიკოსები ხაზს უსვამენ, რომ ამ გათვლებში მხოლოდ ის ტერიტორიებია შესული, სადაც რუსულ ძალებს მანამდე სრული კონტროლი ჰქონდათ.

პარალელურად, OSINT-პროექტი DeepState აღნიშნავს, რომ რუსეთი ინტენსიური შეტევების ფონზე პოზიციებს თმობს. მაისში რუსულმა ძალებმა ფრონტზე 7000-ზე მეტი შეტევა განახორციელეს, რაც აპრილის მონაცემებს 37.5%-ით აღემატება. უკრაინის თავდაცვის სამინისტროს ინფორმაციით, მაისში ფრონტზე 7008 საბრძოლო შეტაკება დაფიქსირდა.

DeepState-ის ცნობით, მაისში რუსეთმა მხოლოდ 14 კვადრატული კილომეტრის დაკავება შეძლო. ეს პირველი შემთხვევაა 2023 წლის ოქტომბრის შემდეგ, როდესაც ოკუპირებული ტერიტორიის ზრდის მაჩვენებელი უარყოფითი გახდა.

ექსპერტები ამ პარადოქსს ტაქტიკის ცვლილებით ხსნიან. რუსული სარდლობა მასიურად გადავიდა ძალიან მცირე, ხშირად 1-2 კაციან ჯგუფებად შეტევაზე. ასეთი დანაყოფები ვერ ახერხებენ პოზიციების გამაგრებას და უკრაინული დრონების სამიზნეები ხდებიან.

3 ფოტო — დააჭირე გასადიდებლად

ISW-ის შეფასებით, რუსეთის წინსვლის შენელება რამდენიმე ფაქტორითაა განპირობებული:

  • უკრაინის არმიის აქტიური სახმელეთო კონტრშეტევები;
  • უკრაინის საშუალო რადიუსის დარტყმების გაძლიერება;
  • რუსული ძალებისთვის Starlink-ის გამოყენების შეზღუდვა (თებერვლიდან);
  • ფრონტზე Telegram-ის მუშაობის შეზღუდვა.

შედეგად, რუსეთის ძალებმა 2025 წლის დეკემბრიდან 2026 წლის მაისამდე პერიოდში სულ რაღაც 40.64 კვადრატული კილომეტრის დაკავება შეძლეს, რაც 2024-2025 წლების ანალოგიურ პერიოდთან შედარებით (515.84 კვ. კმ) მკვეთრი ვარდნაა.